ҚР Орталық сайлау комиссиясының Төрағасы Нұрлан Әбдіров Алматы қаласына келді.
Алматы – жастар қаласы. Осыны ескере отырып, Орталық сайлау комиссиясының басшысы 18 сәуірде Әл-Фараби атындағы Қазақ ұлттық университетінің студенттерімен кездесті. Кездесу көшбасшылық дәріс форматында өтті.
Ортсайлауком Төрағасы «Қазақстанның сайлау жүйесін дамытудың өзекті трендтері» атты тақырыпта дәріс оқыды. Дәріс бір жарым сағатқа созылды. Студенттер үшін бұл ұзақ уақыт бола тұра, қатысушылар қадірлі қонақтың сөздерін ұйып тыңдады. Көшбасшылық дәріс Орталық сайлау комиссиясы мен еліміздің сайлау жүйесінің дамуын ұштастыра өтті. Спикер сайлау комиссиясы құрылғаннан бүгінге дейінгі аралықтағы өзгерістер жайлы баяндады. Сонымен қатар, былтыр ОСК өзінің 30 жылдығын атап өткен еді. Осы орайда Нұрлан Әбдіров Орталық сайлау комиссиясы жанындағы Сарапшылық кеңестің мүшелері Халида Әжіғұлова, Эдуард Мұхамеджанов және Лейла Жанұзақоваға Алғыс хаттарды табыстады. Іс-шараға ҚР ОСК жанындағы Сарапшылық кеңестің мүшелері мен университеттің профессорлық-оқытушылық құрамы, студенттер қатысты. Кездесу соңында студенттер арасында сайлау саласы мәселелері бойынша онлайн-сауалнама жүргізілді.