2025 жылы Қазақстанда алғаш рет тақтатас мұнайын өндіру басталады деп күтілуде. «Қара алтынға» деген әлемдік сұраныстың артуы бұл жобаның жоғары коммерциялық әлеуетке ие екенін көрсетіп отыр. Бұл туралы Үкіметтің кеңейтілген отырысында Премьер-Министр Олжас Бектенов мәлімдеді, деп хабарлайды aqshamnews.kz
– «Тақтатас мұнайын өндіру еліміздің мұнай-газ секторына инвестициялар тарту үшін қосымша серпін береді», – деді Премьер-Министр.
Сонымен қатар, биыл шикізат қоры шамамен 19 млрд м³ газды құрайтын «Батыс Прорва» және «Барханная» кен орындарында газ өндіру жұмыстары басталмақ. Бұл жаңа жобалар энергетикалық сектордағы мүмкіндіктерді кеңейтіп, ел экономикасын әртараптандыруға ықпал етпек.
Қазақстандағы тақтатас мұнайын өндіру және жаңа газ кен орындарын игеру бастамалары елдің энергетикалық әлеуетін арттырып қана қоймай, инвестициялық тартымдылығын да жоғарылатады.