Қазақстанда есірткі зертханалары санының өсуі байқалады.
Осы жылдың жеті айында полиция тек синтетикалық есірткі өндіруді жолға қойған 24 жасырын есірткі зертханасы жойылған, – деп хабарлайды aqshamnews.kz Polisia.kz-ке сілтеме жасап.
Алматыда осындай 11 факт анықталған. Eкінші орынды Алматы облысы иеленген. Бұл өңірден полицейлер жеті заңсыз синтетикалық есірткі өндірісін жойыпты. Есірткі өндірушілерден 200 кг-нан астам “синтетика” және екі тоннадан астам прекурсор тәркіленген.
Соңғы екі аптада Алматыда екі есірткі зертханасы жойылған. Шілде айының соңында үш астаналық тұрғын ұсталыпты. Олар 800 мың теңгеге үй жалдап, онда мефедрон өндірісін ұйымдастырған. Олар барлық жабдықтар мен химиялық заттарға қашықтан тапсырыс беріп отырған. Күдіктілерден 20 кг дайын есірткі, 250 литр прекурсор мен химиялық жабдықтар тәркіленген. Араға он күн салып, полицейлер есірткі сақтады деген күдікпен 23 жастағы алматылық тұрғынды ұстады. Ол тұрып жатқан үйдің төбесін тінту кезінде мефедрон, прекурсор, тыныс алу маскасы, есірткі синтезіне арналған жабдық тәркіленген. Қаскөйдің “виртуалды” кураторлары дайын есірткінің килограмы үшін 1,5 млн теңге төлеуге уәде берген көрінеді. Есірткі өндірісі үшін бұл жігіттің 15 жылға жуық мерзімге бас бостандығынан айырылатыны анық.
Бүгінде есірткі өндірісінде қолданылатын химиялық жабдықтардың айналымы үшін қылмыстық жауапкершілік енгізілген. Қазіргі уақытта Парламент Мәжілісінде есірткі өндіргені үшін жазаны өмір бойына бас бостандығынан айыруға дейін қатаңдататын заң жобасы қаралуда. Бұл бастамаларды қоғам қолдайды. Сонымен қатар есірткіні таратқаны үшін жаза мерзімдерін қысқартып, оларды өндіргені үшін жауапкершілікті күшейту бойынша азаматтар құрған екі петиция қарауға алынды.