Бурабайда өтіп жатқан Ұлттық құрылтайда Мемлекет басшысы Қасым-Жомарт Тоқаев еліміздегі діни ахуалға қатысты өз пікірін білдіріп, бұл мәселеге көңіл бөлінетінін айтты.
«Мәжіліс депутаты Ермұрат Бапи еліміздегі діни ахуалға алаңдаушылық білдіріп жүр. Құрылтай мүшелері Дания Қыдырбаева және Олжас Сүлеймен жат діни ағымдардың жастар арасында, әсіресе спорт саласында ықпалы күшейіп бара жатқанын айтты», – деп атап өтті Президент.
Қасым-Жомарт Тоқаев елімізде теріс діни ағымдарға, қазақтың болмысына жат идеологияларға тосқауыл қою қажеттігіне еш күмән жоқ екенін айтты.
«Теріс ағымдарға, қазақтың болмысына жат идеологияларға тосқауыл қою қажет екеніне еш күмән жоқ», – деді Мемлекет басшысы.
Президент Қазақстанда дін бостандығына кепілдік берілгенін, алайда жүгенсіздікке және тәртіпсіздікке жол берілмейтінін қадап айтты.
«Діннің аса маңызды миссиясы – ұлтты ұйыстыру. Діни ұйымдардың қызметін реттейтін құжаттар осы талапқа сай болуға тиіс», – деп толықтырды ол.
Қасым-Жомарт Тоқаев бұл мәселені жан-жақты қарау керектігін атап өтіп, заңнаманы жаңа жағдайға бейімдеудің маңыздылығына тоқталды.