Қазан айының үшінші онкүндігінде Қарағандыда ерлер мен әйелдер арасында блиц және рапидтен Қазақстан Республикасының чемпионаты өтеді, деп хабарлайды aqshamnews.kz.
Командалық турнир 2024 жылдың 22-26 қазанында өтеді. Қатысуға Қазақстанның облыстарынан және республикалық маңызы бар қалалардан командалар шақырылады.
Команда құрамында 3 ер және 1 әйел болуы керек (резервсіз).
10-ға дейін команда қатысса, жарыс айналымдық жүйе бойынша өтеді. 10 командадан көп болса – швейцариялық жүйе бойынша 9 тур болады.
Жеке турнир 2024 жылдың 26-28 қазанында өтеді. Жарысқа жылдам шахматтан ҚР командалық чемпионатының қатысушылары, халықаралық дәрежедегі шахматшылар, рейтингі 2000 және одан жоғары ерлер, 1 800 және одан жоғары рейтингі бар әйелдер шақырылады.
Уақытты бақылау:
Рапид бойынша әр жүріске 10 минут + 5 секунд.
Блиц: әр жүріске 3 минут + 2 секунд беріледі.
Жеке турнир швейцариялық жүйе бойынша 9 тур болады.
Чемпионаттың жүлде қоры 5 000 000 теңгені құрайды.