Халықтың 16 пайызға жуығы жеке қайырымдылықпен айналысатындарға сенім білдірген, деп хабарлайды aqshamnews.kz
Ел азаматтарының шамамен 25%-ы қайырымдылық қорларына мүлде сенбейтінін айтқан.
ҚҚДИ Әлеуметтанулық зерттеулер орталығының сарапшысы Гүлсайран Нұртайдың айтуынша, бұл шартты түрде әр төртінші адамға сәйкес келеді.
«Қызығы, қайырымдылық қорларына шүбәсіз сенетіндер үлесі де осы шамада – 26,4%. Ал респонденттердің 45%-дан астамы қайырымдылық қорларына ішінара сенеді, атап айтсақ, олардың 29,6%-ы тек кейбір қайырымдылық қорларына сенім білдірсе, 15,8%-ы қорларға емес, қайырымдылықпен жеке айналысатындарға сенетінін айтқан», – деді сарапшы.
Сондай-ақ жиында қазақстандықтардың саналы ата-ана болуды қалай түсінетіні туралы айтылды.
«Зерттеуге сүйенсек, респонденттердің 61,4%-ы ата-ана рөлін өміріндегі ең басты құндылық деп бағаласа, 29,2%-ы аса маңызды аспектілердің бірі деп санайды. Одан бөлек, балалар отбасының басты құндылықтары арасында үшінші орында (38,7%) тұр», - дейді ҚҚДИ Отбасы және гендерлік саясат саласындағы зерттеулер орталығының басшысы Ақнұр Иманқұл.
Маманның сөзінше, Қазақстан қоғамында ата-ана болудың мәртебесі жоғары.
Айта кетсек, 2021 жылы құрылған эксперттік клуб 62 талқылау отырысын өткізіп, оған 2500-ден астам азамат қатысқан.
