Алматылық “Қайраттың” U-19 командасы УЕФА жасөспірімдер лигасының 6-турында гректің “Олимпиакос” жастар құрамасын 2:0 есебімен жеңді, - деп хабарлайды Аqshamnews.kz тілшісі.
Кездесу өте қарқынды басталды. Ойынның небәрі 4-минутында “Қайрат” сапындағы Рамазан Бағдат дәл соққысымен грек командасының қақпасын дәл көздеп, есепті алғаш болып ашты.
Екінші таймда алматылықтар басымдықты толық өз қолына алды. 57-минутта Мұхамедәлі Әбіш “Олимпиакос” қорғанысын қақырата өтіп, таблодағы есепті 2:0-ге жеткізді.
Бұл матчте “Қайрат” бастапқы құрамында Шерхан Қалмұрза, Данияр Ташпұлатов, Әмірбек Базарбаев, Мұстафа Шен, Адлан Нұрғалиев, Шыңғыс Дүйсенбек, Мұхамедәлі Әбіш, Карим Мұхаметжан, Мансұр Бірқұрманов, Әкежан Қалиқұлов және Рамазан Бағдат алаңға шықты.
Осы жеңістің арқасында “Қайрат” U-19 жалпы кезеңде алғашқы толық үш ұпайын иеленіп, турнирді төрт ұпаймен аяқтады. Бұған дейін алматылықтар Португалия, Испания, Кипр және Италия жастар командаларынан ұтылып, Дания клубымен өткен ойында тең түскен еді.
Еске салайық, кешке екі клубтың негізгі құрамалары арасындағы матч өтеді және бастапқы құрам белгілі болған еді.
