Наурызбай ауданында «Халық қатысатын бюджет» бағдарламасы мен қалалық бастамалардың арқасында жылдың соңына дейін 80-нен астам абаттандыру, көгалдандыру мен инфрақұрылымды дамыту жобасы жүзеге асады. Өңірлік коммуникациялар қызметінде аудан әкімі Назира Тоғызбаева осылай деді.
«2024 жылы «Халық қатысатын бюджет» арқылы 10 қоғамдық кеңістік пен екі аулаға 2,5 миллиард теңге бөлінді. Ол қаржы тротуар салып, автосуару жүйесін орнатып, көгалдандыру мен жарықтандыруға, асфальт төсеп, қоршау орнату жұмыстарына жұмсалды. Биыл қаржыландыру көлемі сақталды, қазір тұрғындардан түскен 1300-ден астам ұсыныстың арасынан іріктеліп алынған 34 жаңа жоба іске асырылып жатыр», - дейді Назира Тоғызбаева.
Қазір Шұғыла тұрғын үй кешенінде жаяу жүргіншілер жолын абаттандыру мен қоқыс алаңдарының құрылыс каркастарын орнатып жатыр. Жандосов көшесінде жолды кеңейтіп, тротуарлар салып, автосуару жүйесін құру жұмыстары қолға алынды. Тастыбұлақ өзенінің бойында ұзындығы 1,4 шақырым болатын жаяу жүргіншілер жолы жасалып жатыр.
Жыл соңына дейін Алатау даңғылы мен Сәбденов көшесін абаттандырып, Жандосов көшесінен Ақсай өзеніне дейінгі Сапожников өзенінің арнасын нығайту мен Қарғалы өзенінің Райымбек даңғылына дейінгі жағалауын абаттандыру жағы жоспарланған.
Сонымен қатар, Абай даңғылы мен Қонаев, Алатау, Әшімов, Шаляпин сияқты үлкен-үлкен көшелерде сәндеп жарықтандыруды қолға алмақ.
Қалалық «Дизайн-код» концепциясы аясында 20 көпқабатты үйдің қасбетін жөндеу жұмыстары басталды. Сонымен қатар, өткен жылмен салыстырғанда жөнделетін аулалар саны үш есеге артып, 16-дан 47-ге дейін көбейген.
Аудан әлеуметтік инфрақұрылымды да белсенді түрде жаңартып жатыр. Жеңістің 80 жылдығына орай №187 мектеп аумағы абаттандырылып, «Мәңгілік алау» монументі орнатылды. Ақжар шағын ауданы мен Зиманов көшесінде балалар мен спорт алаңдарына күрделі жөндеу жасалды. Айтматов көшесінде жаңа қоршау орнатылып, арық жүйесі мен спорт жабдықтары жаңартылды. Қосымша бөлінген 200 миллион теңге Қарғалы, Абай, Райымбек, Карьерная мен басқа да көшелер бойынша жобаларды іске асыруға мүмкіндік береді.
Усиков көшесінде сырғымалы және су тасқыны қаупі бар аумақтарды нығайту жұмыстары аяқталды, бұл күшті жауын-шашын кезінде оқыс оқиғаның алдын алуға мүмкіндік береді.
«Барлық жұмыстар қаладағы жайлы орта концепциясы аясында жүзеге асырылып, тұрғындардың қолдауымен жүргізіліп жатыр. Біз ауданымызды абаттандырып қана қоймай, оны қауіпсіз етуге де тырысып жатырмыз», - деп атап өтті Назира Тоғызбаева.