Париж Олимпиадасының күміс жүлдегері Нариман Құрбанов шаңырақ көтерді, деп хабарлайды aqshamnews.kz
Ол өзінің әріптесі, белгілі гимнаст Аида Бауыржановаға үйленіп жатыр. Парижде күміс медаль еншілегеннен кейін Нариман Құрбанов сүйіктісі Аиданың үйлену туралы ұсынысты күтіп жүргенін айтқан еді. Енді Аида Бауыржанова өз ұясынан ұзатылып, қос гимнаст ерлі-зайыпты атанып отыр.
«Біз Аида екеуіміз 2018 жылы таныстық. Сол уақыттан бері қыз-жігіт болып араласып келеміз. Сүйіктім Аида да гимнастшы. Ол да спорттың қиындығы мен қызығын жақсы түсінеді. Біз екеуіміз де үлкен спорт жолынан өткенбіз, сондықтан бір-бірімізге қолдау көрсетіп, алға жылжуымызға ықпал етіп отырмыз. Бұйыртса, тойымыз қыркүйекте болады», – деп жазды Құрбанов әлеуметтік желідегі парақшасында.
Жас жұбайлар алдағы уақытта спорттық мансаптары мен отбасылық өмірлерін қатар алып жүруді жоспарлап отыр. Нариман мен Аида спортты әрі қарай жалғастыруды көздеп, болашақта еліміздің гимнастика саласына қосқан үлестерін одан әрі нығайтуға ниеттенуде.
Екі спортшының жанкүйерлері бұл қуанышты жаңалықты жылы қабылдап, жас жұбайларға бақыт тілеп, алдағы өмірлеріне тек сәттілік тіледі.