Мемлекет басшысы Еуразиялық көлік дәліздерін цифрландырудың маңызын атап өтті, – деп хабарлайды aqshamnews.kz тілшісі.
Мемлекет басшысы Еуразиялық көлік жүйесі Азия, Еуропа және Таяу Шығыс нарықтарын байланыстыратын жоғары технологиялық халықаралық маршруттар желісі екенін айтты. Бұл – жалпы ұзындығы 50 мың шақырымнан асатын кең ауқымды көлік дәліздері жүйесі, оның 10 мың шақырымнан астамы Қазақстан аумағы арқылы өтеді.
"Жаһандық сауда-экономикалық байланыстар жүйесіндегі өз рөлімізді сақтау үшін бізге трансшекаралық инфрақұрылымды одан әрі дамыту және цифрландыру қажет. Икемді логистикалық шешімдер, жеткізілім тұрақтылығы және жүктердің өту жылдамдығы Еуразиялық экономикалық одақтағы транзиттік ағындарды айтарлықтай арттыруға мүмкіндік береді", – деді Қасым-Жомарт Тоқаев.
Оның айтуынша, одақ аясындағы ақпараттық жүйелердің өзара интеграциясы – заман талабы.
"Еуразиялық экономикалық комиссияның ұлттық сервистердің цифрлық витринасын құру жөніндегі жұмысы өте өзекті. Бұл үдерістерді жеделдетіп, ЕАЭО-ның толыққанды цифрлық көлік экожүйесін қалыптастыру қажет. Осы бағыттағы күш-жігерді біріктіру Еуразияның жоғары технологиялық көлік хабын құруға мүмкіндік береді", – деді Президент.