27 қаңтарда Ленинградтың фашист басқыншыларының қоршауынан азат етілгеніне 80 жыл толды. Бұл тарихи оқиғаны жыр алыбы Жамбыл Жабаев өзінің «Ленинградтық өрендерім» атты жырында мәңгілікке қалдырған. Аталған қасіретті өз көзімен көргендердің бірі – отставкадағы майор, шекара ардагері Юрий Федорович Никифоров.
Ленинград қоршауында болған күндерді басынан кешірген Юрий Федоровичпен кездесу Алматы облысы Қарасай ауданы шекара қызметінің сарбаздары үшін ерекше әсерлі болды. Ардагермен кездесу шекарашы ардагерлердің «Застава тарландары» республикалық қоғамдық бірлестігі төрағасының орынбасары, Алматы облысы бойынша филиалының басшысы, запастағы полковник Дәулетқали Мамырхановтың басшылығымен ұйымдастырылды.
Кездесу барысында ардагер Ленинград қоршауындағы қиын кезеңдер туралы жан тебірентерлік естеліктерімен бөлісті. Ол сол кездегі қоршаудағы өмірді, аштықтан аман қалған балалық шағын еске алды. Әкесі соғыстың алғашқы күнінде майданға аттанып, Венгрияда қаза тапса, анасы қоршаудағы қиыншылықтан қайтыс болғанын, ал ағасы екеуін әжесінің қалай құтқарып қалғанын айтты.
Юрий Федорович суворовшылар мектебін аяқтаған соң, әскери байланысшыларды даярлайтын училищеге түсіп, Қазақстанда шекара қызметінде ұзақ жылдар қызмет етті. Осы жылдарда ол Қазақ радиосының дикторы Мұқағали Мақатаевпен танысып, оның өлеңдерін тыңдағанын ерекше мақтанышпен әңгімеледі.
Кездесу соңында шекара қызметінің бөлім бастығы подполковник Сағадат Әуезов ардагердің тағылымды әңгімесі үшін алғысын білдіріп, жас сарбаздарға ақ жол тіледі.