Төтенше жағдайлар вице-министрі болған Ибрагим Күлшімбаев бостандыққа шықты
Апелляциялық сот Төтенше жағдайлар министрлігінің бұрынғы орынбасары Ибрагим Күлшімбаевқа қатысты үкімді өзгертті. Оған билікті асыра пайдаланды деген айып тағылған болатын. Күлшімбаев Қарағандыда ұлына үй салу үшін әскерилерді мәжбүрлегені үшін айыпталған еді, деп хабарлайды aqshamnews.kz.
Бүгін Астанадағы әскери сот Күлшімбаевтың ісін қайта қарастырып, оның әрекетін «билікті асыра пайдалану» баптан «қызмет бабын асыра пайдалану» бабына ауыстырды. Осыған байланысты Күлшімбаевқа қатысты үкім өзгертіліп, бас бостандығынан айырудың орнына бостандығын шектеу жазасы берілді. Сот алқасы бұрынғы генерал-майорды сот залынан босату туралы шешім шығарды.
«Сот алқасы шешім қабылдады: 2024 жылғы 6 тамыздағы Ақмола гарнизонының әскери сотының Ибрагим Күлшімбаевқа қатысты үкімін өзгерту. Күлшімбаевтың әрекетін Қазақстан Республикасы Қылмыстық кодексінің 450-бабының 1-бөлігіне сәйкес қайта саралап, оған үш жыл мерзімге бостандығын шектеу жазасы тағайындалсын. Сондай-ақ, пробациялық бақылау орнатылып, тұрақты жұмысы немесе оқуы болмаған жағдайда мәжбүрлі түрде жыл сайын 100 сағат еңбекке тартылсын», — деп үкімді жариялады сот төрағасы Рамазан Хасенов.
Алайда апелляциялық сот бірінші инстанцияның Күлшімбаевтың кінәсі толық дәлелденгені туралы шешімімен келісті.
Еске сала кетейік, экс-вице-министр бес жылға бас бостандығынан айырылған болатын. Сот материалдарына сәйкес, Төтенше жағдайлар министрлігінің жоғары лауазымды қызметкері тек әскерилерді ұлының үйін салуға мәжбүрлеп қана қоймай, автоматты қақпалар мен бейнебақылау камераларын сатып алуды да талап еткен.