«Акваөсіру туралы» заң аясында көлде немесе тор қоршамада өсіру қызметін жүзеге асыруға арналған шарттарды мерзімінен бұрын бұзу негіздері қарастырылған.
Депутаттар енгізген түзетулер аясында аквашаруашылық саласындағы адал емес субъектілердің тізілімі жасалады, деп хабарлайды aqshamnews.kz Мәжіліске сілтеме жасап.
Осы тізілімге енгізілген, шарттық міндеттемелерін орындамаған аквашаруашылық субъектілеріне балық шаруашылығы су айдындары мен учаскелерін бекітуге 5 жыл бойы өтінім беруге тыйым салынады.
Халықаралық және республикалық маңызы бар су айдындарындағы шаруашылықтар үшін мына міндеттемелер белгіленді:
• балық өсіру көлемін даму жоспарына сәйкес жүргізу;
• бизнес-жоспар мен жобаның жұмыс бағдарламасын орындау;
• жаңа өндірістік нысандарды салу, соның ішінде қайта өңдеу қуаттарын енгізу немесе қолданыстағы өндірістерді кеңейту, реконструкциялау және жаңғырту;
• Қазақстан Республикасының салық заңнамасына сәйкес тор қоршаудағы шаруашылық қызметін жүзеге асыру үшін төлем енгізу.
Сондай-ақ аквашаруашылықты дамытуға бағытталған субъектілерге субсидияларды ұтымды пайдалану және бөлу үшін аквашаруашылық субъектілеріне және оны дамытуға жауапты субъектілерге субсидия беруден бас тарту негіздері, аквашаруашылықты субсидиялау аясында алынған қаражатты қайтару талаптары мен мерзімдеріне қатысты шаралар қарастырылған.