Жүн өңдейтін кәсіпорын салуға 217 млн теңгеге дейін субсидия беріледі.
Жүн өңдеу кәсіпорындарының құрылысына кеткен шығынды инвестициялайтын қаражат көлемі 868 млн теңгеден аспауы керек. Мемлекет соның 25 пайызына субсидия береді. «Мемлекеттік сатып алу туралы» заң жобасына осындай өзгеріс енгізілмекші, -деп хабарлайды Almaty-akshamy.kz. ҚазАқпаратқа сілтеме жасап.
Бұл туралы Премьер-Министр Әлихан Смайылов Мәжіліс депутаттарының сауалына жолдаған жауабында айтты.
«Мемлекеттік сатып алу туралы» заң жобасының реттеушілік саясаттың консультативтік құжатымен отандық тауар өндірушілерді қолдау, сондай-ақ сапалы тауарларды сатып алу мақсатында тапсырыс берушіге отандық өнім берушілер өндіретін бірнеше тауарлардың фирмалық атауларын көрсетуге мүмкіндік беру көзделген. Қазіргі кезде аталған заң жобасы мүдделі мемлекеттік органдармен келісіліп жатыр. Өз кезегінде жүнді өңдеу саласын дамыту үшін Инвестициялық салымдар кезінде агроөнеркәсіптік кешен субъектісі шеккен шығыстардың бір бөлігін өтеу бойынша субсидиялау қағидалары шеңберінде жаңа кәсіпорындарды салу және жұмыс істеп тұрғандарын жаңғырту кезінде жүн жуу кәсіпорындарының шығындарын өтеу көзделген. Жүн өңдеу кәсіпорындары құрылысының ең жоғары рұқсат етілген құны 868 млн теңгені, кеңейту 430 млн теңгені құрайды. Инвестициялық салымдарды өтеу үлесі 25% құрайды», - делінген жауапта.
Сондай-ақ, Үкімет басшысының айтуынша, жүн дайындаушы ұйымдарға мемлекеттік қолдау ретінде жүн қырқу пунктерін, жылжымалы қырқу пунктін, қой қырқатын электрлік механикалық құрал-саймандарды 25 % мөлшерде субсидиялау қарастырылған.
«Бұдан басқа, ауыл шаруашылығы жануарларының жүнін өңдеу тауарлары Агроөнеркәсіптік кешен субъектілеріне кредит беру, сондай-ақ ауыл шаруашылығы жануарларын, техникасы мен технологиялық жабдығын сатып алуға лизинг кезінде сыйақы мөлшерлемелерін субсидиялау қағидаларының Ауыл шаруашылығы өнімін өндіру және (немесе) өңдеу саласындағы басым жобалар бойынша кредит және қаржылық лизинг берілетін тауарлар тізбесіне енгізілген. Мемлекеттік бюджеттен «Өнеркәсіпті дамыту қоры» АҚ құралдары арқылы 3% кредиттік мөлшерлемемен жеңіл өнеркәсіптің инвестициялық жобаларын қаржыландыру үшін 50 млрд теңге бөлінді», - деп жазады Әлихан Смайылов.