Алматы қаласында орналасқан, 80 жылдық тарихы бар 7552 әскери бөлімінде жас сарбаздардың әскери ант қабылдау салтанатты рәсімі өтті.
Әскери ант қабылдау рәсімінің алдында «Жас сарбаз» сыныбының оқушылары жетекшілері – запастағы полковниктер Ниязтай Әлкешев пен Елдос Шалабаевтармен бірге әскери бөлім аумағымен танысты. Олар сарбаздардың жатын үй-жайын аралап, тұрмыс-тіршілігімен танысып, асхананы көріп, әскери тағамнан дәм татты. Жас өрендердің әскери бөлімге жасаған бұл сапары олардың жадында ұзақ сақталары сөзсіз. Бұл – іс-шараның әскери-патриоттық бағыттағы маңызды мақсаттарының бірі.
Саптық алаңдағы салтанатты рәсім Қазақстан Республикасының Мемлекеттік Гимнімен ашылып, еліміздің көк байрағы салтанатты түрде көтерілді. Мемлекеттік Туды көтеру құрметі оқу пунктінің үздік сарбазы, қатардағы Дәурен Сүлейменовке берілді.
Салтанатты жиында сөз сөйлеген Қазақстан Республикасы Ұлттық ұланы «Оңтүстік» өңірлік қолбасшылығы қолбасшысының техника және қару-жарақ жөніндегі орынбасары полковник Мақсат Кенжебеков жас сарбаздарды өмірлеріндегі маңызды кезеңмен құттықтап, алдағы әскери қызметтеріне табыс тіледі:
-Бүгін сіздер Отан алдындағы қасиетті борышты адал атқаруға серт беріп отырсыздар. Әскери ант – бұл үлкен жауапкершілік пен жоғары сенімнің белгісі. Сіздерге тәртіпке берік болып, ел қауіпсіздігін қамтамасыз ету жолында адал еңбек етулеріңізге тілектеспін, – деді ол.
Сонымен қатар мінберге сарбаздың анасы Рабиға Аманәліқызы көтеріліп, жас жауынгерлерге жүрекжарды тілегін арнады:
- Бүгін ұлдарымыздың ел қорғау жолына нық қадам басқанын көріп, ата-ана ретінде ерекше мақтаныш сезімін сезініп отырмыз. Барша сарбаздарға амандық, төзімділік пен табандылық тілеймін. Ел сенімін ақтап, абыроймен қызмет атқарады деп сенеміз, – деді ол.
Осылайша, жас жауынгер курсынан өтіп, әскери ант қабылдаған сарбаздар алдағы бір жыл бойы құқық қорғау әскерінің қатарында қызмет атқаратын болады.
Айта кетейік, осы күні «Оңтүстік» өңірлік қолбасшылықтың Шымкент қаласындағы 6698, Жетісу облысындағы 5514 және Алматы облысындағы 3660 әскери бөлімдерінде де әскери ант қабылдау рәсімі өтіп, жалпы саны 600-ге жуық жас сарбаз Отан алдындағы қасиетті борышына адал болуға ант берді.