Денсаулық сақтау мен спорт саласында бірнеше нысанда құрылыс жүріп жатыр, деп хабарлайды aqshamnews.kz тілшісі.
Биылғы 8 айының қорытындысы бойынша Алмалы ауданының негізгі капиталына 80 млрд теңге инвестиция тартылып, өсім 15,8%-ды құрады. Өңірлік коммуникациялар қызметінде Арман Шамшин осылай деді.
Денсаулық сақтау мен спорт саласында бірнеше нысанда құрылыс жүріп жатыр. Биылғы қараша айында Әйтеке би мен Масаншы көшесінің қиылысында ауысымына 500 адам қабылдауға шақталған жаңа емхананы пайдалануға беру жоспарланып отыр. 2027 жылғы наурызға қарай бірінші перзентхананың жаңа корпусын салу жұмысы да аяқталып қалады.
Тастақ шағын ауданында, Райымбек даңғылы бойында ерекше қажеттілігі бар адамдарға арналған спорт орталығы салынып жатыр. Қазір нысандағы құрылыс жұмысының орындалу деңгейі 70%-ға жетіп қалды.
Білім беру саласында қыркүйек айының соңына қарай №16 мектепке арналған 300 орындық қосымша ғимаратты пайдалануға беріледі. Сонымен қатар №124 мектеп күрделі жөндеуден өтті. Қазір Абай даңғылындағы балаларды оңалту орталығының жобасын іске асыруға дайындық басталды.