Мемлекет басшысы Қасым-Жомарт Тоқаев сыбайлас жемқорлыққа қатысты құқықбұзушылықтар «Халықтық құрылыс» бағдарламасын іске асыруға кедергі келтіруі мүмкін екенін айтты. Президенттің сөзінше, әлеуметтік инфрақұрылым нысандары сапалы салынуы керек. Ал мемлекеттік қаражаттың тиімді жұмсалуын арнайы комиссия қадағалайды, деп хабарлайды aqshamnews.kz тілшісі.
Мемлекет басшысы еліміз жаңа тарихи кезеңге қадам басқанын айтып, Әділетті Қазақстанды құру жолында жалқаулық пен селқостыққа жол бермеу керектігін атап өтті.
«Ал сыбайлас жемқорлыққа батқан ниеті теріс кісілер – біздің қас жауымыз. Олар қазірдің өзінде «Халықтық құрылыс» бағдарламасын іске асыруға кедергі келтіріп, зиян тигізуді ойлап жүр. Біз бұған, әлбетте, ешқашан жол бермейміз», – деді Қасым-Жомарт Тоқаев.
Президенттің айтуынша, жолдар, әуежайлар, емханалар, оңалту орталықтары, шығармашылық үйлері, мектептер мен спорт кешендері сапалы салынуы тиіс.
Қасым-Жомарт Тоқаев әлеуметтік инфрақұрылым нысандарының құрылысына бөлінген қаражаттың тиімді жұмсалуын арнайы мемлекеттік комиссия қадағалайтынын мәлімдеді. Оның құрамын келесі аптаның басында жариялау жоспарланып отыр.
«Барлық әлеуметтік инфрақұрылым нысандары, соның ішінде жолдар, әуежайлар, емханалар, оңалту орталықтары, шығармашылық үйлері, мектептер мен спорт кешендері сапалы салынуы керек. Бұл – мүлтіксіз орындалуға тиіс талап. Мемлекет қаржысының тиімді жұмсалуын арнайы мемлекеттік комиссия қадағалайды. Оның құрамы келесі аптаның басында жарияланады», – деді Мемлекет басшысы.
Сондай-ақ Президент халықтың әл-ауқатын арттыру және азаматтардың тұрмыс сапасын жақсарту міндеттерін жүзеге асыруда Конституцияда бекітілген Заң, Әділеттілік және Тәртіп қағидаттары басшылыққа алынатынын айтты.
«Сондықтан табандылық танытып, алға қойған мақсаттарымызға міндетті түрде қол жеткіземіз», – деді Қасым-Жомарт Тоқаев.
Оқи отырыңыз: Президент Үкіметке мемлекеттік компаниялардағы жемқорлықты азайту жөнінде ұсыныс беруді тапсырды