ҚР Мәдениет және ақпарат министрлігінің қолдауымен ұйымдастырылған бұл бірегей мәдени жоба биыл бесінші мәрте шымылдығын түрді, – деп хабарлайды aqshamnews.kz тілшісі.
Жамбыл атындағы Қазақ мемлекеттік академиялық филармониясының Үлкен залында еліміздің хор өнеріндегі ең ауқымды шаралардың бірі – дәстүрлі «Гүл Алматы – 2026» V фестивалі жоғары деңгейде өтті.
Биылғы фестивальдің басты ерекшелігі – оның ауқымында. Сахна төрінде балалар мен кәсіби ұжымдардан құралған 9 хор ұжымы, яғни 500-ге жуық өнерпаз тоғысты. Бұл қалалық ауқымдағы фестиваль ұлттық хор мектебінің сабақтастығын көрсетіп, жас таланттар мен кәсіби шеберлер арасындағы алтын көпірге айналды.
Фестивальге қатысқан ұжымдар: Бейімбет Демеуов бастаған Б. Байқадамов атындағы Мемлекеттік хор капелласымен бірге сахнада «Көкек» және «Көктем» балалар хорлары, А. Жұбанов атындағы мектеп-интернаттың ұлдар мен қыздар хоры, Қазақ ұлттық қыздар педагогикалық университетінің ұжымы, «ALAKOZ» камералық хоры, «Княжичи» ерлер хоры, Құрманғазы атындағы ҚҰК хоры және Астанадан арнайы келген Е. Рахмадиев атындағы филармонияның камералық хоры өнер көрсетті.
Бағдарлама мазмұны: Мерекелік кеште қазақ композиторларының классикалық туындылары, ару қала Алматыға арналған лирикалық әндер және әлемдік музыканың еркін жанрдағы жауһарлары шырқалды. Көрермендер хор музыкасының сан алуан бояуын сезініп, жоғары рухани әсер алды.
Ұйымдастырушылардың айтуынша, бұл жоба тек концерт қана емес, сонымен қатар еліміздегі хор мектептерінің өзара тәжірибе алмасуына, репертуардың байыуына және балалар шығармашылығының жаңа белеске көтерілуіне ықпал ететін маңызды кәсіби алаң.