Депутаттардан тағы бір тыйым: концерттерде фонограмма қосуға тыйым салынуы керек, себебі тыңдарман жанды дауысқа ақша төлейді деді депутат Мақсат Толықбай, деп хабарлайды aqshamnews.kz
Мәжіліс депутаты Мақсат Толықбай көрермен неге билет сатып алып, «фанера» тыңдауы керек деп ашынды.
«Заң бойынша концерттерде фонограмманы жасырын қолдануға тыйым салынған. Яғни, іс-шараны ұйымдастырушылар бұл туралы көрермендерге хабарлауға міндетті, бірақ ешкім мұны орындамайды», – деді ол.
Депутаттар заң жобасына фонограмма қолдануға қатысты бірнеше түзету енгізгенімен, олар қабылданбады.
«Көптеген сылтаулар айтылды – өңірлердегі техниканың 70%-ы ескі, білікті дыбыс режиссерлері жетіспейді, тағы басқа. Ақырында, біз былай ұсындық: егер концерт өтетін орын (стадион немесе үлкен алаң) іс-шараға бейімделмеген болса, фонограмманы қолдануға рұқсат беру керек. Ең бастысы – көрермендер алдын ала хабардар болуы тиіс», – деп түсіндірді депутат.
Мәдениет және ақпарат вице-министрі Айбек Сыдыков министрлік бұл мәселе бойынша мамандардың пікірін ескеретінін айтты.
«Біз барлық мүдделі тараптарды жинап, ашық талқылау өткізуге келістік. 11 наурызда бұл мәселені шоу-бизнес өкілдерімен, мәдениет мекемелерінің басшыларымен және режиссерлермен бірге қарастырамыз», – деп уәде берді вице-министр.