Белгілі бір себептерге байланысты табыстан айырылғаныңызды немесе отбасында кіріс азайғанын тиісті құжатпен растай алсаңыз, несие төлемін кейінге шегерте аласыз, деп хабарлайды aqshamnews.kz
Егер Сіз:
әлеуметтік осал топтағы азамат болсаңыз;
төтенше жағдайдан зардап шексеңіз;
кәсіпкер болсаңыз — бұл жаңа ереже Сізге қатысты.
Жеңілдік қандай жағдайда жасалады?
Белгілі бір себептерге байланысты табыстан айырылғаныңызды немесе отбасында кіріс азайғанын тиісті құжатпен растай алсаңыз, несие төлемін кейінге шегерте аласыз. Ол кезде ай сайынғы төлемді 3 айға дейін кейінге қалдыруға болады.
Не істеу керек?
Иә, жаңа тәртіптің өз шарты бар. Қарыз иесі арнайы бекітілген формада өтініш жазып, тұрмыс жағдайының қиындағанын растайтын құжаттарын тапсыруы керек. Ал банк немесе микроқаржы ұйымы оны 15 күн ішінде қарауға тиіс.
Бұған дейін елімізде несие төлемін кейінге шегеру туралы нақты әрі міндетті мұндай тәртіп болмаған. Тұтынушылар банкке немесе микроқаржы ұйымына жағдайын айтып өтініш бергенімен, шешім шығару — ұйым құзыретінде болды. Енді жаңа талапқа сай, өтінішіңіз уақытылы қаралмаса, жауапты мекемелерге шағымдана аласыз. Ереже тамыздың 31-інен бастап күшіне енеді.
ҚР Қаржы нарығын реттеу және дамыту агенттігінің өкілі Ғаділбек Әкім былай дейді:
«Несиені шегергілеріңіз келсе алдын-ала қимылдаған жөн. Көп созбай омбудсмендерге шығу керек. Одан шешім болмай жатса, әрине, қаржы нарығын қадағалау агенттігіне ресми түрде Е-Өтініш арқылы немесе аймақтық өкілдерге немесе орталық аппаратқа келіп, арыз жазуыңызға болады.»