Қазақстанда 2026 жылдың қаңтар айында мемлекеттік жәрдемақылар мен Мемлекеттік әлеуметтік сақтандыру қорынан төленетін төлемдер арқылы 164,1 мың адамға 59,2 млрд теңге көлемінде қолдау көрсетілді, деп хабарлайды Aqshamnews.kz тілшісі.
Еңбек және халықты әлеуметтік қорғау министрлігінің мәліметінше, бала тууына байланысты біржолғы жәрдемақыны 28,5 мың адам 5,6 млрд теңгеге алды. Оның мөлшері: алғашқы үш балаға – 164 350 теңге, төртінші және одан кейінгі балаларға – 272 475 теңге.
1,5 жасқа дейінгі бала күтіміне байланысты жәрдемақы 130,2 мың адамға 4,2 млрд теңге көлемінде төленді. Ай сайынғы төлем мөлшері баланың кезегіне қарай 24 912 теңгеден 38 493 теңгеге дейін жетеді. 2026 жылдың басынан бастап бұл жәрдемақылар 10%-ға индекстелді.
Сонымен қатар жұмыс істейтін азаматтарға жүктілік және босану бойынша МӘСҚ-тан төленетін біржолғы әлеуметтік төлем қаңтар айында 17,4 мың адамға тағайындалып, жалпы сомасы 16,8 млрд теңгені құрады. Орташа төлем мөлшері – 1,16 млн теңге.
Бала 1,5 жасқа толғанға дейін табысынан айырылу жағдайына байланысты ай сайынғы әлеуметтік төлем 16,5 мың адамға 32,6 млрд теңге көлемінде берілді. Орташа айлық төлем 78 294 теңгені құрады.