Мәжіліс депутаты Бақытжан Базарбек жанкүйерлер мен Уэльс футбол федерациясының шағымдарынан кейін Қазақстандағы футбол стадиондарының жағдайына наразылық білдірді. Ол жұрт асыға күтіп жүрген "Қайрат-Реал Мадрид" матчын Астанада ұйымдастыруды ұсынды, деп хабарлайды Aqshamnews.kz тілшісі.
Депутаттың сөзінше, шетелдік жанкүйерлер, соның ішінде "Реал Мадрид" жанкүйерлері, стадионға және жолдың ұзақтығына, қыркүйек айының аяғындағы суық ауа райына да наразы болуы мүмкін.
"Қазақстанның абыройы үшін қажет болса негізгі аренаға көшіретіндей футбол федерациясы бар мүмкіндікті қолдануы керек", – деді ол.
Базарбек халықаралық матчтар елдің беделін көрсетуі керегін атап өтті. Ол Қазақстан футбол федерациясына екі стадионның форматын қарастыруды ұсынды: маңызды ойындарды "Астана Аренада", ал деңгейі төменірек қарсыластармен кездесулерді Алматыдағы "Орталық" стадионында өткізу – ең тиімді шешім деп санайтынын отандық БАҚ-тардың біріне берген сұхбатында айтты.
Еске салайық, 30 қыркүйекте Алматылық "Қайрат" футбол клубы чемпиондар лигасының негізгі кезеңінде корольдік клуб Реал Мадридпен текетіреседі. Ойын "Орталық стадионда" өтеді.