Қатысушылар өзара білім мен шешендікті, тапқырлық пен логикалық ойлауды сынға салды, деп хабарлайды aqshamnews.kz тілшісі.
Кітап оқитын ұлт» ұлттық жобасының «Кітап оқитын колледж» бағыты аясында бірқатар жас ақыл-ой сайысында бас қосты. «DEBATE CUP – 2026» дебаты кітап оқуға және білімге құмар жастарды бір ортаға тоғыстырды.
Алматы облыстық орталық әмбебап кітапханасын ұйытқы болған зияткерлік додаға колледж студенттері қатысып, өзара білім мен шешендікті, тапқырлық пен логикалық ойлауды сынға салды. Жеребе нәтижесінде бөлінген командалар пікірталастың әр кезеңінде өз ұстанымдарын қорғап, қарсы тараптың уәждеріне жауап берді.
Дебат – дауласу емес, ой жарыстыру. Мұнда сауатты бір ғана сұрақ жаңа ойдың есігін ашуы ықтимал. Сондықтан пікірсайыс барысында жастардың тек шешендік қабілеті емес, мәселені жан-жақты зерделеуі мен ойын жүйелі жеткізе білуі де сыналды.
Турнирге қатысушыларды Абай университеті филология факультеті деканының орынбасары Аяжан Кеңесхан, айтыскер ақын Сырым Әуезхан, «Алматы ақшамы» газетінің тілшісі Дана Садырхан және Жазушылар одағының мүшесі, Мәдениет саласының үздігі Динара Мәлік сияқты әр сала өкілдері әділқазы ретінде бағалады.
Пікірсайыс арасында Абай университетінің студенттері ұсынған музыкалық бағдарламалар зияткерлік кештің мазмұнын байыта түсті.
Ал «TezTap» интеллектуалды ойыны қатысушылардың білімін ғана емес, ой ұшқырлығы мен зеректігін де таразылады. Нәтижесінде Бас жүлде «Платонус» тобына бұйырса, I орынды «Ділмар», II орынды «Дәлел», III орынды «Жас Қыран» командалары иеленді.
Жастардың кітаптан алған білімін өмірлік ойға айналдырып, оны көпшілік алдында еркін жеткізе білуі ақыл-ой жарысының басты жетістігі ретінде есте қалды. «Кітап оқитын колледж» жобасы да дәл осы мақсаты осыны көздеген болатын.