Мәжіліс депутаты Ермұрат Бапи бүгінгі жалпы отырыста Атырауда төрт қыздың тұмшаланып, арабша жазуы бар мемлекеттік ту ұстап түскен суретіне қатысты мәселе көтерді.
Ол Бас прокурор Б.Асыловқа сауал жолдап, бұл оқиғаны жан-жақты зерттеуді талап етті, деп хабарлайды aqshamnews.kz.
Депутаттың айтуынша, қыздар ұстаған көк тудағы араб қарпіндегі жазу арнайы баспа құралымен өте сапалы түрде таңбаланған. Сондықтан бұл оқиға тек тұрмыстық бұзақылық немесе әдепсіздік қана емес, мемлекеттігімізге, ұлттық дәстүріміз бен бірегейлігімізге жасалған ашық әрі мақсатты қарсылық ретінде қарастырылуы керек. Ол мұндай заң бұзушылықтар қатаң әрі бұлжытпай жазалануы тиіс екенін атап өтті.
Сонымен бірге, Ермұрат Бапи бұл төрт қыз әлдебір арандатушы топтың құрбаны болуы мүмкін екенін ескертті. Олардың мұндай әрекетке жастық албырттықпен, материалдық қызығушылықпен немесе діни сауатсыздық салдарынан баруы ықтимал. Сондықтан ең алдымен осы әрекетті ұйымдастырған және бағыттаған күштерді анықтап, жазаға тарту қажет деді.
Депутат сонымен қатар Wildberries Russ маркетплейсінде түрі бұрмаланған Қазақстан туының еркін сатылып жатқанын мәлімдеді. Бекітілген стандартқа сай келмейтін, ресми сипаты өзгертілген мемлекеттік рәміздерді саудаға шығарған орындарды жауапқа тартуды және сатылған туларды жинап, жоюды талап етті.
Сондай-ақ, Ермұрат Бапи заңнамаға түзетулер енгізіп, ұлттық бірегейлікке нұқсан келтіретін, қоғамды жікке бөлуді көздейтін тауарларды сататын маркетплейстерге қарсы санкция салуды ұсынды. Мемлекет радикалды ағымдардың заңға қайшы әрекеттеріне бақылауды күшейтіп, діни құндылықтарды бұрмалауға қарсы шараларды қатаңдатуы қажет екенін айтты.
Ол ұлттық бірегейлікті қорғау саясатын жүйелі түрде қалыптастырудың уақыты жеткенін атап өтті. Бұл мақсатта зайырлы білім беру жүйесін нығайтып, мектептердегі дінтану сабақтарын ұлттық мұра негізінде жүргізу бағдарламасын әзірлеуді ұсынды. Сонымен қатар, ұлттық мәдениетті дамытуға, дәстүрлі киім киюді насихаттауға және жастар арасында кең ауқымды түсіндіру жұмыстарын жүргізуге тиісті мемлекеттік органдарды шақырды.