Жаңа Конституция мемлекеттің әлеуметтік саладағы жауапкершілігін күшейтеді, деп хабарлайды aqshamnews.kz тілшісі.
Қазақстанның денсаулық сақтау жүйесі қаржыландыру көлемін бағалаудан пациенттің өзі сезінетін нақты көрсеткіштерге – медициналық көмекті қаншалықты жылдам алатынына, тексерулер мен дәрі-дәрмектердің қолжетімділігіне көшуі керек.
Мұндай пікірді «Sarap» сарапшылар клубының отырысында денсаулық сақтау саласының сарапшысы, дәрігер-анестезиолог Жаннұр Қалиғожин айтты.
Сарапшының айтуынша, жаңа Конституция мемлекеттің әлеуметтік саладағы жауапкершілігін күшейтеді. Бұл ретте жаңа саяси модель үшін негізгі мәселелердің бірі – бекітілген кепілдіктердің азаматтардың өмір сүру сапасына қалай әсер ететіні.
Қалиғожин елімізде денсаулық сақтау жүйесі біршама тұрақты қалыптасқанын атап өтті. Тегін медициналық көмектің кепілдік берілген көлемі бар, емханалық медициналық қызмет дамыған, жоғары технологиялық медициналық көмектің кең ауқымы қолжетімді.
Алайда оның пікірінше, дамудың келесі кезеңінде жүйені одан әрі кеңейтуден гөрі оның сапасына көбірек көңіл бөлу қажет.
Менің ойымша, қазір денсаулық сақтау сапасы туралы мәселе көтеретін уақыт келді. Өйткені халық үшін денсаулық сақтау саласына бюджеттен қанша қаражат бөлінгенін білу және түсіну соншалықты маңызды емес. Адам денсаулық сақтау жүйесінен нақты не алатынын түсінуі керек, – деді Жаннұр Қалиғожин.
Сарапшы пациент үшін реформалардың тиімділігі нақты дүниелермен өлшенетінін түсіндірді. Яғни дәрігерге дер кезінде қаралу, қажетті тексеруден өту және тиісті дәрі-дәрмектерді алу мүмкіндігі маңызды.
Яғни адам кепілдік берілген көмекті қаншалықты жылдам ала алады, қажетті тексеруден дер кезінде өте ала ма, мемлекет уәде еткен дәрі-дәрмектерді ала ма – мәселе осында. Адам барлық реформаны, негізінен, осы көрсеткіштер арқылы бағалайды, – деп атап өтті ол.
Қалиғожиннің айтуынша, дәл осы өмір сүру сапасы қазіргі электоралдық күн тәртібінің негізгі бағдарларының біріне айналуы тиіс.
Ол сондай-ақ Құрылтайдың жаңа құрамында конституциялық кепілдіктерді азаматтардың күнделікті өміріне тікелей әсер ететін нақты әрі өлшенетін көрсеткіштерге айналдыру мүмкіндігі бар екенін атап өтті.