Бүгін дәстүрлі онлайн таныстырылым кезінде қала әкімі Бақытжан Сағынтаев осылай деді.
Сонымен қатар қала басшысы ел арасында айтылып жүрген «қайтадан онлайн оқу болады екен» деген алыпқашпа әңгіменің де нүктесін қойды, деп хабарлайды Almaty-akshamy.kz тілшісі.
Баламызға мектеп киімін алып қойсақ, қайтадан онлайнға ауысып кетпей ме, мектептің қажеттілігі де аз шығын емес қой деген тыңдарман сұрағына қала әкімі былай деп жауап берді:
«Біз балаларды бір жарым жыл онлайн режимде оқыттық, ұдайы бұлай ұстап отыра алмаймыз. Мемлекет басшысы да, Үкімет те тапсырма берді, Білім министрі де биылғы сабақ мектепте өтеді деді. Демек, біз биылғы оқу жылын оффлайнда бастаймыз. Қаланың тиісті қызметі мектепті дайындауға кірісіп кетті, дезинфекция жұмыстары да жүргізіліп жатыр. Сондықтан біз әдеттегідей 1 қыркүйекте оқушыларды қарсы алуға дайынбыз».
Мегаполис басшысының айтуынша, барлық мектепте Ashyq жүйесі жұмыс істеп тұрады.
«Ұстаздардың барлығы вакцинаның екі компонентін де салдырды. Мұғалімдерден бөлек мектепте жұмыс істейтін қызметкердің бәрі екпе алуы керек. Бірақ ата-аналар тарапынан да сондай дайындық керек, ата-аналардың барлығы екпе салдырған болуы тиіс. Дені сау ата-ананың баласының да дені сау болатынын ұмытпайық», -деді Бақытжан Әбдірұлы.
Қала әкімінің мәлімдеуінше, белгілі санаттағы оқушыларға әкімдік тарапынан көмек те жасалып жатыр.
«Мектепті дайындаумен қатар, жылдағыдай тұрмысы төмен отбасы балаларын мектепке дайындау шарасын да бастап кеттік. «Мектепке жол» акциясы аясында көмек көрсетілетін үйдің балаларының әр аудан әкімшілігінде тізімі бар. Ол балалардың мектепке қажетті заттарын алып беру жұмысы жүріп жатыр», - деді Алматының әкімі.