Атырау облысында зейнеткерге шабуыл жасаған күдікті ұсталды, деп хабарлайды Aqshamnews.kz тілшісі.
Жылыой ауданына қарасты Қосшағыл ауылында мүгедектігі бар зейнеткер әйелге белгісіз адам шабуыл жасаған. Atyrau ONLINE мәліметінше, бейтаныс әйел үйге баса-көктеп кіріп, 62 жастағы әйелдің бетіне сірке суын шашқан. Соның салдарынан зейнеткер химиялық күйік алып, көру қабілеті нашарлаған.
Жәбірленушінің қызының айтуынша, дәрігерлер алғашқы көмек көрсеткенімен, науқастың жағдайы ауыр болса да үйіне жіберген. Ал қаскөй алтын әшекейлерді алып, оқиға орнынан қашып кеткен.
Күдікті ұсталды
Полицияның дерегінше, оқиға туралы хабар 27 қазанда түскен.
"Белгісіз әйел үйге кіріп, өткір иісі бар сұйықтықты шашып, алтын бұйымдарды жымқырып кеткен. Жедел-іздестіру шаралары нәтижесінде 55 жастағы күдікті анықталып, ұсталды. Ол уақытша ұстау изоляторына қамалды," – деп мәлімдеді Атырау облыстық ПД.
Зейнеткерге медициналық көмек көрсетіліп, қазіргі таңда жағдайы тұрақты екені айтылды.
Тергеу жүргізіліп жатыр
Аталған факті бойынша күш қолдана отырып қарақшылық жасау бабымен сотқа дейінгі тергеу басталды.
Полиция тұрғындарға:
-
бейтаныс адамдарға есік ашпауға,
-
қарттарды бақылауда ұстауға,
-
күмәнді жағдайларды көрсе 102-ге хабарласуға шақырды.