Алматы – мүмкіндіктер қаласы. Мұнда сапалы білім алуға, жақсы жұмыс табуға, кәсіп бастауға және өмір сүруге барлық жағдай жасалған. Дегенмен, қалада баспана мәселесі әрқашан өзекті. Әсіресе жастар үшін Алматыдан үй алу – үлкен жетістік.
Қалада жас мамандар мен жаңадан отбасын құрған жандар үшін баспаналы болуға түрлі бағдарламалар қарастырылған. Осындай мүмкіндікті пайдаланған жастардың бірі – Алматы электромеханикалық колледжінің оқытушысы Тұңғышбай АМАНХАН.
Ол 2020 жылы «Нұрлы жер» бағдарламасы арқылы сатып алу құқығынсыз берілетін жалдамалы пәтерге ие болған. Алғашында Алатау ауданы, «Ақкент» ықшамауданындағы екі бөлмелі пәтерде тұрған жас отбасы бес жыл ішінде өз баспанасына қаражат жинауға мүмкіндік алған.
– Ол кезде жаңа ғана үйленген жас жұбайлар едік. Бағдарламаның арқасында ай сайын небәрі 11-12 мың теңге ғана төлеп тұрдық. Егер қарапайым жалдамалы пәтерде тұратын болсақ, 150-180 мың теңге төлеуімізге тура келер еді. Үнемделген қаражатты Отбасы банкіндегі депозитке жинадық. Нәтижесінде «Алматы жастары» бағдарламасы арқылы 18 миллион теңгеге жеке үй алдық. Қазір үш баланың ата-анасымыз, – дейді Тұңғышбай Аманхан.
Жас маман мемлекет ұсынған мүмкіндіктерді тиімді пайдаланып, өз арманына қол жеткізгенін атап өтті.
– Бұл бағдарлама бізге үлкен көмек берді. Егер жалдамалы пәтерге көп ақша жұмсасақ, үй алуға мүмкіндік болмас еді. Шын ниеттенген адам мақсатына жетеді екен. Армандар орындалады! – дейді ол.
Тұңғышбай Аманханның еңбекқорлығы – көптеген жас отбасыларға үлгі. Бастысы – мақсат қойып, берілген мүмкіндіктерді пайдалана білу. Бүгінде Алматыда жастарға арналған «Алматы жастары», «Бақытты отбасы», «Шаңырақ» сынды баспана бағдарламалары жұмыс істейді. Бұл бағдарламалар арқылы баспаналы болуға әрбір жастың мүмкіндігі бар.
Алматыдан үй алу – көптеген жандардың арманы. Бастысы – мақсат қойып, жүйелі түрде әрекет ету. Мемлекет ұсынған мүмкіндіктерді тиімді пайдалана білген әрбір жас өз баспанасына қол жеткізе алады. Егер сіз де Алматыдан үй алуды армандасаңыз, тұрғын үй бағдарламалары туралы ақпарат алып, дұрыс жоспар құруды бүгіннен бастаңыз.