Бейжің Олимпиадасында қазақстандық могулшылар алғашқы іріктеу кезеңін өткізді
Жарысты алдымен әйелдер бастады, деп хабарлайды Almaty-akshamy.kz Olympic.kz-ке сілтеме жасап.
Бірінші іріктеу кезеңінен соң финалға шығу мүмкін болмады. Отандық могулшылар алғашқы ондық қатарына ене алмады. Аяулым Әміренова 16-шы, Олеся Граур 23-ші орында. Анастасия Городко жарыс жолынан шығып кеткендіктен, финалға өте алмады. Енді олар 6 ақпан күні өтетін екінші іріктеу сынына қатысады.
«Бірінші трамплиннен секірген соң қате жібердім. Десе де, бәрі жаман деп айта алмаймын. Олимпиада мерекесі сезіліп тұр, көңіл-күйім жақсы», - деді Олеся Граур.
«Бүгінгі көрсеткішім жаман емес. Бірақ бұдан да жақсы нәтиже көрсететін мүмкіндік бар еді. Әлі берілмейміз, екінші кезең бар», - дейді Аяулым Әміренова.
«Қобалжу болған сияқты. Секіру де, басқасы да ойдағыдай шыққан жоқ», - деді Анастасия Городко.
Бейжің Олимпиадасының алғашқы жарыс күнінде фристайл-могулдан ерлер арасындағы іріктеу сыны аяқталды.
Бірінші іріктеу айналымында қазақстандық спортшылар алғашқы ондыққа енген жоқ. Дмитрий Рейхерд 75.43 ұпаймен 12-орын алды.
Павел Колмаков 74.09 ұпаймен 17-орында. Екі спортшымыз да 5 ақпан күні өтетін іріктеу кезеңінің екінші айналымында сынға түседі.
Іріктеу кезеңінің қорытындысы бойынша алғашқы ондыққа енген могулшылар финалға бірден жолдама алды. Канадалық Микаэль Кингсбери 81.15 ұпаймен көш бастап келеді.