Екі жыл бұрын Президенттің тапсырмасымен «Жайлы мектеп» ұлттық жобасы басталды.
Бурабайда өтіп жатқан Ұлттық құрылтай барысында Президент Қасым-Жомарт Тоқаев аталған жобаға қатысты бірқатар тапсырма берді, деп хабарлайды aqshamnews.kz.
Ақмола облысы ұлттық жоба бойынша салынатын барлық мектептің құрылысын бірінші болып аяқтады. Аймақта 12 мыңнан астам оқушыға арналған жаңа білім ошақтары ашылды.
«Басқа облыстарда құрылыс барысы мәз емес. Үкімет пен «Самұрық-Қазына» қоры бұл жұмысты қолға алуы керек. Мен таяу арада тексеремін», -деді Мемлекет басшысы.
Биыл елімізде 500 мың оқушыға арналған екі жүзден астам мектеп салынады. «Жайлы мектеп» жобасына қатысты Президент қаперде ұстау қажет бір жайтты айтты.
«Барлық жерде тек «Жайлы мектеп» жобасы аясында мектеп салу міндетті емес. Сапалы салынған қарапайым мектептерге де сұраныс жоғары. Үш жылда 1300, соның ішінде ауылдағы 900 білім ордасын жаңғырту қажет. Жаңа оқу жылына дейін мемлекеттік және жекеменшік мектептің барлығы балалардың қауіпсіздігін қамтамасыз ететін арнайы құралдармен жабдықталуға тиіс», - деді Президент.