Қала әкімі Бақытжан Сағынтаев «Алматы» ТА-да Akimat Live бағдарламасының тікелей эфирінде қала тұрғындарының сұрақтарына жауап бере отырып, жылуды мерзімінен бұрын қосуға болатынын айтты.
Алдыңғы жылыту маусымындағыдай, ауа райы салқын болса, жылыту маусымы ертерек басталуы мүмкін, деп хабарлайды Almaty-akshamy.kz
Қалыптасқан тәжірибеге сәйкес, ауа температурасы + 8°C және бес күн ішінде одан төмен болса, онда жылыту маусымының басталатыны белгілі.
Бақытжан Сағынтаев қала тұрғындарының денсаулығы қымбат болғандықтан, күн суық болған жағдайда жылу берілетінін атап өтті.
Бүгінде жылу желілерін дайындау бойынша жұмыстар жүргізілуде, олардың толық дайындығы ағымдағы жылдың 25 қыркүйегіне дейін жоспарланған.
