Алматы қаласы мәслихатының депутаты Болат Ибрагимұлының бастамасымен «Ақсай» балалар ауруханасының кішкентай пациенттері жаңа жылдық сыйлықтар мен шаттыққа бөленді.
Жаңа жыл қарсаңында С.Д.Асфендияров атындағы ҚазҰМУ-дың Республикалық клиникалық «Ақсай» балалар ауруханасында кішкентай науқастарға арналған ерекше, жылы да шынайы жаңа жылдық шара өтті. Алматы қаласы мәслихатының депутаты Болат Ибрагимұлының бастамасымен емделіп жатқан балаларға сыйлықтар әзірленіп, мерекелік бағдарлама мен аниматорлардың қойылымдары ұйымдастырылды. Шараның мақсаты – балаларға қуаныш сыйлап, мерекелік көңіл-күй қалыптастыру.
Отыздан астам бала жаңа жылдық сыйлықтар мен жылы тілектер алды. «AMANAT» партиясының еріктілері мен аниматорлар ойындар, әзіл-қалжың және көңілді қойылымдар ұсынып, балалардың жүзінде шынайы күлкі мен қуаныш сыйлай алды. Дәрігерлердің айтуынша, мұндай шаралар балаларға ем-шаралардан бір сәт назарын бөліп, эмоционалдық қолдау береді.
Еске сала кетейік, «Ақсай» ауруханасы – орталық жүйке жүйесі аурулары, тірек-қимыл аппаратының бұзылыстары, эндокринологиялық және тұқым қуалайтын дерттері бар балаларға көмек көрсететін көпсалалы медициналық мекеме. Мұнда күн сайын үлкен жауапкершілік пен жанашырлықты талап ететін маңызды жұмыс – емдеу, оңалту және балалар мен олардың отбасыларына қолдау көрсету жүзеге асырылады.
«Кішкентай ғана көңіл мен мейірімнің өзі балаға үміт пен қуаныш сыйлай алады. Мен үшін бұл балалардың өздерін жалғыз емес, жанында сенетін әрі қолдайтын адамдар бар екенін сезінуі маңызды. Дәрігерлер мен аурухана ұжымына жанқияр еңбектері мен адами жылулығы үшін шын жүректен алғыс айтамын»,- деді Болат Ибрагимұлы.
Осындай игі бастамалар балаларға мереке атмосферасын сезінуге мүмкіндік беріп, емделу кезеңінде де жанында жылулық пен қамқорлық бар екенін еске салады.