Атыраудағы Қарабалиндер отбасының қазасына байланысты қозғалған қылмыстық іс жаңа мәліметтермен толықты. Тергеу барысында күдіктілер Сұлтан Сәрсемәлиев пен Ақбаян Мұқанғалиеваның шетелге нақты қашан кеткені және олардың қалай қолға түскені анықталған, – деп хабарлайды aqshamnews.kz тілшісі.
Индонезия полициясы өкілі Рикки Пурнаманың айтуынша, іздеуде жүрген екі күдікті Ломбок аралындағы қонақүйлердің бірінде жасырынған. Құқық қорғау органдары келген сәтте Сұлтан Сәрсемәлиев қашуға әрекет жасағанымен, көп ұзамай ұсталған.
Оларды ұстау операциясына Интерполдың ұлттық бюросы, Солтүстік Ломбок полициясы және көші-қон қызметінің өкілдері қатысқан.
Тергеу мәліметінше, күдіктілер 2025 жылғы 14 желтоқсанда Куала-Лумпурдан Бали аралына ұшып барып, кейін Ломбокқа өткен. Сол жерде ұсталғанға дейін бой тасалап жүрген.
Бұл іс 2025 жылғы 25 желтоқсанда тіркелген. Сол күні Атырау облыстық полициясына бір отбасының жоғалғаны туралы арыз түскен. Туыстары олардың қараша айынан бері хабарсыз кеткенін айтқан.
Іздестіру шаралары барысында 6 қаңтарда зейнеткер ерлі-зайыптының мәйіті табылып, 8 қаңтарда жер қойнына тапсырылған. Кейін қылмыстық іс адам өлтіру бабы бойынша қайта сараланып, отбасының өзге мүшелерін іздеу жалғасқан. Алайда арада көп уақыт өтпей олардың да мәйіттері табылған.
Қайғылы оқиға салдарынан 66 жастағы Мақсот Қарабалин, 64 жастағы Нәсіп Өтешқалиева, 35 жастағы Мирамгүл Қарабалина және 32 жастағы Наурыз Мұқанғалиев көз жұмған.