Елдегі санитарлық-эпидемиологиялық ахуал туралы Үкімет отырысы өтті.
Қазақстан Үкіметінің жетекшісі отырыста халықты вакцинациялау жұмысын жалғастыруды тапсырды, деп хабарлайды Almaty-akshamy.kz ҚазАқпарат сайтына сілтеме жасап.
"Дельта" штамының таралуына байланысты өңірлерде эпидемиологиялық жағдай нашарлады. Республика бойынша науқастану айтарлықтай көбейген. Ауруханадағы орындар санының 56 пайызы, ал реанимациялық орындардың 44 пайызы толды", - деді Асқар Мамин.
Үкімет басшысы пандемиядан шығудың жалғыз жолы – вакциналау екенін еске салды.
«Қазіргі уақытта 5,5 млн-ға жуық адам вакцинаның бірінші компонентін ектірді және 4 млн-ға жуық адам екінші компонентін алды. Бұл жұмысты жалғастыру қажет», - деді Премьер-Министр.
Бұған дейін ҚР Денсаулық сақтау министрі Алексей Цой Үкімет отырысында елдегі эпидемиологиялық жағдайды баяндаған еді.
Қазақстан Республикасы 26 маусымнан бері «қызыл» аймақта тұр. Түркістан облысынан басқа өңірлер түгел «қызыл» аймақта.