Тұрғындардың демалуына, балалардың ойнауына және спортпен шұғылдануына жайлы жағдай жасалды, деп хабарлайды aqshamnews.kz тілшісі.
Алматының Жетісу ауданында аулаларды көркейту жұмыстары жалғасып жатыр. Биыл ағымдағы жөндеу бағдарламасы аясында Рысқұлов даңғылы, 60-мекенжайындағы аула жаңартылды.
Жұмыс нәтижесінде тұрғындардың демалуына, балалардың ойнауына және спортпен шұғылдануына жайлы жағдай жасалды.
3,2 мың шаршы метр аумаққа асфальт төселіп, тағы 400 шаршы метрге жуық жерге жарақат алу қаупін азайтатын тартан жабыны төселді. Балаларға арналған алты ойын кешені бар алаңқай жабдықталды. Сонымен қатар футбол алаңы жасалып, үш көше тренажері мен бір воркаут кешені орнатылды.
Тұрғындарға қолайлы болу үшін 17 орындық пен қоқыс жәшігі қойылды. Көгалдандыруға да ерекше көңіл бөлінді. Аумағы 2 мың шаршы метрден асатын көгалды тұрақты күтіп-баптау үшін автоматты суару жүйесі орнатылды.
Осылайша, Рысқұлов даңғылы, 60-мекенжайындағы аула әр жастағы тұрғындардың демалуына және белсенді уақыт өткізуіне арналған заманауи инфрақұрылыммен толықты.