Ақтау қаласында құбырдағы апат салдарынан бірқатар шағынауданда ауыз су беру шектелді, деп хабарлайды Aqshamnews.kz тілшісі.
«Каспий жылу, су арнасы» мемлекеттік коммуналдық кәсіпорнының мәліметінше, қаланың бірнеше аумағында ауыз су жартылай тоқтатылған. Салдарынан тұрғын үйлер мен әлеуметтік нысандар ауыз сусыз қалған.
Атап айтқанда, 27-шағынауданда №2, 44, 45, 53, 54, 57, 71, 72, 74, 75, 76 ғимараттар зардап шеккен.
16-шағынауданда “Айсар” тұрғын үй кешені, №18 ғимарат, “Бек” мейрамханасы, бизнес орталығы мен моншада су өшірілген.
3В-шағынауданда энергетикалық колледж бен оқу орталығында ауыз су жоқ.
Сондай-ақ 4-шағынауданда №1, 2, 3, 20, 21, 67 үйлер, №5 мектеп және №67А ғимарат сумен қамтылмай отыр.
Ал 1-ден 8-ге дейінгі, сондай-ақ 14 және 15-шағынаудандарда ауыз су қысымы төмендетілген.
Коммуналдық кәсіпорын өкілдері жөндеу жұмыстары аяқталған соң, сумен жабдықтауды қалпына келтіру уақыты қосымша хабарланатынын мәлімдеді.
Еске салайық, бұған дейін ауыз суға арналған жеке есептегіш құралы жоқ қазақстандықтардың суды екі есе қымбат төлейтіні туралы жазылған болатын.