Алматы қаласы Жұмыспен қамту және әлеуметтік бағдарламалар басқармасының Ерте араласу әлеуметтік қызметтер орталығында арт-терапия сабағы өтті. Оған осы орталықтан тегін қызмет алып жүрген балалар ата-анасымен қатысты.
Арт-терапияның Қазақстан халқының бірлігі күніне орайластырылғаны да жайдан-жай емес. Бұл орталыққа түрлі этнос өкілдері келеді. Бәрі тату, бір-біріне тілекші. Себебі бәрі де күнде жетектеп жүрген, денсаулығында кінәраты бар баласының толыққанды өмірге араласып кетуіне жанын салып жүр. Олар күнде орталыққа келгенде бір-бірімен шұрқырай амандасып, хал-жағдай сұрасып қауқылдасып жатады. Бүгінгі арт-терапия да балаларды, ата-аналарды және орталық қызметкерлерін бір-біріне тағы да жақындастыра түскендей. Балдырғандар мамандар көмегімен бейнетерапия мен ойын терапиясына қатысты. Алақанмен сурет салды. Әр балаға жеке-жеке көңіл бөлінді. Орталық қызметкерлері кішкентай достарын сабақ кезінде мақтап, мадақтап, көтермелеп отыруды да ұмытқан жоқ.
– Арт-терапия кезінде өз жұмысына риза болған кішкентай балдырғандармен бірге өзіміз де мәз бола қуандық. Балалар өзін еркін сезінді. Арт-терапиялық сабақтың мақсаты да сол – ол жұмыс үстінде өзін жайлы сезініп, мазасыздығы басылып, ой-әрекеті бір арнаға шоғырланып, өзі сөзбен жеткізе алмайтын немесе дауыстап айта алмайтын нәрсесін бояу, сурет арқылы білдіріп, нәтижесінде өз іс-қимылынан қуат алады. Балаларға ынтымақтаса істеген топтық жұмыс та ұнады деп ойлаймын. Арт-терапия олардың ұсақ моторикасын, шығармашылық ойлау қабілетін, сөйлеуін дамытады. Біздің кішкентай достарымызға және ата-аналарына бір сәттік қуаныш сыйлай алғанымыздың өзі үлкен жетістік, – дейді Алматы қаласы
Ерте араласу әлеуметтік қызметтер орталығының директоры Нұрзия Ағабекқызы.