Қаңтардың 18-інен 19-ына қараған түні Крещение мерекесін атап өту кезінде Алматы қаласындағы адам көп жиналатын орындар мен шомылуға арналған ресми рұқсат етілген аумақтарда медицина қызметкерлері күшейтілген режимде жұмыс істейді. Бұл туралы Өңірлік коммуникациялар қызметінде өткен баспасөз конференциясында Алматы қаласының Жедел медициналық жәрдем қызметі директорының орынбасары Павел Бурда мәлімдеді, деп хабарлайды aqshamnews.kz
Оның айтуынша, шомылуға арналған барлық ресми орындарда жедел медициналық жәрдем бригадалары тәулік бойы кезекшілік етеді. Медициналық топтар білікті мамандармен толықтырылған, олар суықтан тоңып қалған, өзін жайсыз сезінген немесе жедел көмекке мұқтаж азаматтарға дер кезінде көмек көрсетуге толық дайын.
Бригадаларды орналастыру, жету бағыттары мен өзара байланыс тәртібі Төтенше жағдайлар департаменті бөлімшелерімен және жергілікті атқарушы органдармен бірлесіп алдын ала пысықталған. Қажет болған жағдайда кезекші бригадалар күшейтіліп, жағдайға қарай адам күші мен техниканы қайта бөлу де қарастырылған.
«Жедел медициналық жәрдем қызметі қала тұрғындары мен қонақтарын діни рәсімге жауапкершілікпен қарап, қауіпсіздік талаптарын сақтауға және дәрігерлердің кеңесіне құлақ асуға шақырады. Суық суға түсер алдында денсаулық жағдайын ескерген жөн. Жүрек-қантамыр, тыныс алу және эндокриндік жүйе аурулары бар, суық тиген немесе созылмалы дерті асқынған адамдарға шомылудан бас тарту ұсынылады. Сондай-ақ мас күйде суға түсуге қатаң тыйым салынады», – деді Павел Бурда.
Медицина қызметкерлері суық суда ұзақ уақыт болмау керектігін ескертеді. Судан шыққаннан кейін бірден жылынып, құрғақ әрі жылы киім мен аяқ киім киіп, қайтадан суыққа шығуға болмайды.
«Егер адам өзін жайсыз сезініп, басы айналып, ентігіп, қатты қалтырап немесе өзге де қолайсыз жағдай туындаса, дереу кезекші жедел жәрдем бригадасына немесе Төтенше жағдайлар департаментінің қызметкерлеріне жүгіну қажет», – деп атап өтті ол.
Алматы қаласының Жедел медициналық жәрдем қызметі мерекелік іс-шаралар кезеңінде жоғары дайындық режимінде жұмыс істеп, барлық шұғыл шақыртуларға үздіксіз әрі жедел әрекет етуге толық дайын.
