Алматы қаласы Қылмыстық-атқару жүйесі департаментіне қарасты №11 мекемеде жазалы жасөспірімдер де Наурыз мейрамын атап өтті. Наурызнама онкүндігі аясында мекеме аумағында мерекелік іс-шаралар ұйымдастырылды, деп хабарлайды aqshamnews.kz
Мекеме ішіндегі мектеп ұстаздары бас бостандығынан айырылса да, білім алып жатқан оқушыларға «Көрісу күні», «Қайырымдылық күні» және «Ұлттық киімдер күні» сияқты атаулы күндердің мән-мағынасы түсіндірілді. Слайдтар, әр түрлі көрнекті құралдар мен материалдар арқылы ұлтымыздың қайта жаңғырып жатқан әдет-ғұрыптары мен салт-дәстүрлерінен мол мәліметтер берілді.
Мекеме қызметкерлері және тәрбиеші-мамандардың жетекшілігімен жазалы балалар Жаңару күнінде ағаштардың түбін қопсытып, айналаны тазалап, Ұлттық ойындар күнінде спорттық іс-шараларға белсене қатысты.
Жамбыл атындағы қалалық жасөпірімдер кітапханасының қызметкерлері кітаптар көрмесін ұйымдастырды. Арнайы қонақ болып келген өнерпаздар жасөспірімдерге ән-жырдан шашу шашып, мерекелік көңіл күй сыйлады.