Алматыда адам папиллома вирусына қарсы 11 жастағы қыздарды вакцинациялау бойынша ауқымды науқан қарсаңында дайындық жұмыстары белсенді жүргізілуде. Денсаулық сақтау министрлігі бекіткен вакцинацияны енгізу жоспарына сәйкес ағымдағы жылдың қыркүйек айынан бастап 11 жастағы барлық қыздар өз мектептерінде тікелей вакцинациядан тегін өте алады, деп хабарлайды aqshamnews.kz.
АПВ-ға қарсы вакцинация процесі қалай ұйымдастырылатынын Өңірлік коммуникациялар қызметінің брифингінде Алматы қаласы Санитарлық-эпидемиологиялық бақылау департаменті басшысының орынбасары Әсел Қалықова айтып берді.
«Вакцинация алты ай аралықпен екі дозаны алуды көздейді. Ұйымдастырылған ұжымда біз тиісті контингентті барынша қамтуды қамтамасыз ете аламыз. Мектептердің медициналық қызметкерлері жазғы демалыс басталғанға дейін вакцинация техникасы бойынша дайындалды. Қажет болған жағдайда мектепке бару үшін қосымша бригада құрылады. Мектептердің егу кабинеттерінде вакцинация жүргізу үшін жағдайлар жасалған», - деп бөлісті ол.
Вакцинация ата-аналардың тек жазбаша келісімімен жүзеге асырылады. Процедурадан бұрын әр баланы қарсы көрсеткіштерді анықтау үшін дәрігер тексереді. Вакцинациядан кейін балаларды медициналық қызметкерлер 30 минут бойы бақылайды. Сонымен қатар, вакцинациялауға тек тәжірибелі медицина қызметкерлері ғана жіберіледі.
Алматыда 11 жастағы қыздардың саны 17 мыңға жуық екені алдын ала анықталған, алайда бұл көрсеткіш өзгеруі мүмкін. Қазіргі уақытта Алматыға вакцина жеткізіледі деп күтілуде.