Бүгін Алматы қаласында Almaty Digital Medical Center (ADMC) - Қазақстандағы тұңғыш Цифрлық медицина орталығының ашылу рәсімі өтті. Жоба Алматы қаласы Қоғамдық денсаулық сақтау басқармасы мен Цифрландыру басқармасы арасындағы меморандум аясында жүзеге асырылды.
Іс-шараға Алматы қаласы ҚДСБ басшысы орынбасарының м.а. Лайла Имангалиева қатысты.
Орталықты құрудың басты мақсаты - қаланың денсаулық сақтау жүйесінің ашықтығы мен тиімдігін арттыру. Цифрлық медицина орталығы - емхана жұмысын, тұрғындардың денсаулығын бақылауды және халықпен байланысты түбегейлі өзгертетін кешенді цифрлық платформа.
ADMC құрамына кіретін негізгі цифрлық қызметтер:
- Ақпараттық-талдау орталығы
- Бірыңғай байланыс орталығы - 1312
- Телемедициналық патронаж
- Жасанды интеллект негізіндегі виртуалды дауыстық көмекші
- Телемедицина қызметі
- Ақпараттық-талдау орталығы
Жасанды интеллект көмегімен есептілік қалыптастыратын, өңірдің ауқымды медициналық дерегін өңдеуді қамтамасыз ететін және МСАК желісінің бизнес-процестерін қайта құрумен айналысатын сарапшылар тобы. Орталық мамандары денсаулық көрсеткіштерін нақты уақыт режимінде бақылап, талдап, алынған ақпаратты басқарушылық шешім қабылдау үшін ҚДСБ-ға жолдайды
Бірыңғай байланыс орталығы - 1312
Алматылықтардың денсаулық сақтау мәселелері бойынша қоңырау қабылдайды, сол арқылы емхананың тиімді жұмысын қамтамасыз етеді.
Пациент дәрігерге жылдам жазылады және сұрақтарына жедел жауап алады.
Дәрігерлер мен әкімшілік қызметкерлер қоңырауға алаңдамай, пациентке көбірек көңіл бөле алады.
Контакт-орталық азаматтардың барлық өтінішін қабылдап, жүйелеп, маңыздығына қарай сұрыптайды және жүйелі проблемаларды талдайды.
Бұл шешім емхана тіркеу бөлімдерінің және ҚДСБ-ның жүктемесін шамамен 20%-ға азайтып, тұрғындардың жоғалған қоңырауын 1%-ға дейін төмендетуге мүмкіндік береді.
Телемедициналық патронаж
Пациенттерді қашықтан бақылаудың заманауи форматы, ол медициналық көмектің қолжетімдігін арттырып, МСАК қызметкерлерінің жүктемесін азайтады.
Телепатронаж аясында маман пациентке қоңырау шалып немесе онлайн-консультация өткізіп, жағдайын қадағалайды, дәрі қабылдауын еске салады және дәрігерге баруды бақылайды. Сонымен қатар күрделі жағдайда жедел шешім қабылдау үшін телемедициналық консилиум ұйымдастыру мүмкіндігі енгізілген.
Бұл тәсіл кезекті азайтып, маусымдық аурудың таралу қаупін төмендетеді. Сондай-ақ науқастың жағдайы нашарлау қаупін дер кезінде анықтап, ауруханаға жатқызу санын қысқарту арқылы денсаулық сақтау жүйесінің жүктемесін және қаржылық шығынды азайтады.
Жасанды интеллектке негізделген дауыстық көмекші
Пациентті скринингке, вакциналауға, флюорографияға автоматты түрде шақырады, қабылдау уақытын еске салады және нәтижені тіркейді (келісімін берді, бас тартты немесе тексерістен өтті). Бұл сервис медицина қызметкерлерін күнделікті қоңырау шалудан босатады.
Мысалы, бір жылдың ішінде тек флюорографиядан өту үшін шамамен 545 мың қала тұрғыны шақырылады. Мұндай көлемді қолмен қамту өте көп уақытты алады және іс жүзінде мүмкін емес. Ал скрининг пен вакциналауды қоса алғанда, шақырту миллиондаған қоңырауға жетеді. Енді бұл жұмысты дауыстық көмекші атқарады, ал медицина қызметкерлері диагностика мен емдеуге көбірек уақыт бөледі.
Телемедицина қызметі
Алматыда бұл қызмет 2020 жылдан бері жұмыс істейді. Ол COVID-19 пандемиясы кезінде қала әкімдігі мен ҚДСБ бастамасымен іске қосылған. Бастапқыда негізгі міндет - коронавируспен сырқаттанған науқасты үй жағдайында қашықтан бақылау болатын.
Қазір телемедицина қызметі тәулік бойы жұмыс істеп, кең ауқымды функцияны орындайды:
- 1312 нөмірі арқылы тұрғындар өтінішін қабылдайды;
- Оларды құзыретіне қарай мамандарға жолдайды;
- Жалпы медициналық кеңес береді;
- Қаладағы медициналық ұйым, дәріхана, зертхана мен жеке орталықтар туралы ақпарат ұсынады.
Күн сайын телемедициналық орталық мамандары шамамен 1500 науқасқа қоңырау шалады. Бұл - жедел жәрдем шақырғанымен, шұғыл госпитализацияға жатпаған пациенттер. Сондай-ақ жүкті әйелдерге, босанғандарға және балаларға мониторинг жүргізіледі.
Онлайн-консультациялар
Цифрлық медицина орталығында жетекші мамандар онлайн кеңес береді: гинеколог, кардиолог, невропатолог, аллерголог, фтизиатр, хирург, функционалдық диагностика дәрігері, офтальмолог, эндокринолог, реабилитолог, инфекционист, маммолог, уролог және ЛОР. Бұл тұрғындарға медициналық қызметтің кең спектрін заманауи цифрлық форматта бір жерден алуға мүмкіндік береді.
Халықаралық тәжірибе және даму жоспары
ADMC әлемнің алдыңғы қатарлы елдерінің тәжірибесін, сондай-ақ Қазақстан өңірлерінің үздік тәжірибелерін ескере отырып құрылды. Осы негізде Алматы қаласы Цифрлық медицина орталығының тұжырымдамасы жасалды.
2026 жылға дейінгі жоспар:
- Телепатронаждың жаңа бағыттарын іске қосу;
- Қаланың барлық мемлекеттік медициналық ұйымын Бірыңғай байланыс орталығына көшіру;
- Дауыстық көмекші қызметін дамыту;
- Рецепт пен еңбекке жарамсыздық парағын онлайн беру;
- Телерадиологиялық орталық ашу;
- Жасанды интеллект негізіндегі шешімді сынақтан өткізу үшін цифрлық медициналық хаб құру.
Almaty Digital Medical Center - жай ғана цифрландыру жобасы емес, медицина мен халықтың өзара іс-қимылының жаңа стандарты.
Оның тиімдігі дәлелденді:
- Медицина қызметкерлерінің ондаған мың сағаты үнемделді;
- Мыңдаған тұрғын медициналық қызметке ыңғайлы қолжетімдік алды
- Денсаулық сақтау жүйесінің жұмысы ашық әрі басқаруға қолайлы бола түсті.