Ішкі істер министрі жариялаған "Профилактика жылы: полиция заң мен тәртіп күзетінде", сондай-ақ "Есептегі тұлға" республикалық жедел-алдын алу іс-шарасы аясында Алматы қаласының полиция қызметкерлері бас бостандығынан айыру орындарынан босатылған азаматтарға әлеуметтік-құқықтық көмек көрсету және оларды жұмысқа орналастыру бағытында жүйелі жұмыстар жүргізіп жатыр.
Тек Түрксіб ауданының өзінде бұл іс-шара барысында ішкі істер органдарында профилактикалық есепте тұрған үш адам тұрақты жұмыспен қамтылды, деп хабарлайды aqshamnews.kz.
– Бұрын сотталған азаматтардың қылмысқа қайта бармауы үшін олардың әлеуметтік қорғалуы мен қоғамға бейімделуі аса маңызды. Тәжірибе көрсеткендей, тұрақты табысы жоқ адамдар қылмысқа жиі барады. Сондықтан біз пробация қызметімен бірлесе отырып, жұмысқа орналастыру бағытындағы жұмыстарды тұрақты түрде жүргіземіз. Учаскелік полиция инспекторлары жұмыспен қамту орталықтарына ай сайын есептегі азаматтардың тізімін жолдап отырады. Өткен жылы осындай шаралар нәтижесінде 24 адам тұрақты жұмысқа орналасқан, – деді Түрксіб аудандық полиция басқармасының басшысы Думан Аухадиев.
Сонымен қатар қайталанатын қылмыстардың алдын алу мақсатында учаскелік инспекторлар пробация қызметімен бірлесіп, есепте тұрған азаматтардың тұрғылықты жері бойынша күнделікті тексеру жұмыстарын жүргізуде. – Бүгінде ауданымызда 318 азамат түнгі уақытта тұрғылықты жері бойынша тексерілді. Нәтижесінде үш заң бұзушылық анықталды. Оның ішінде бір азаматқа ҚР әкімшілік заңнамасын бұзғаны үшін хаттама толтырылды, ал екі адамға қатысты соттың мерзімінен бұрын шартты түрде босату туралы шешімі жойылды, – деді Думан Аухадиев.
Ақпарат көзі Polisia.kz сайтында: https://polisia.kz/almatyda-politsiya-buryn-sottalghan-azamattardy-zhumysqa-ornalastyrugha-komektesti/