Алматы қаласының Медеу аудандық полиция басқармасының қызметкерлері ірі алаяқтық ісін ашып, заңдылықты қалпына келтірді. Құқық қорғау органдарының жедел әрі кәсіби әрекеттерінің арқасында жергілікті тұрғынның құқығы қорғалды, деп хабарлайды aqshamnews.kz
Алаяқтар азаматтың пәтерін заңсыз иемденуге әрекет жасап, оны алдап кетуге тырысқан. Дегенмен, Медеу аудандық полиция басқармасының анықтау бөлімінің қызметкерлері бұл қылмысты терең зерттеп, әрбір эпизодты мұқият талдау арқылы әділеттілікті орнатты.
Зардап шеккен азамат полиция қызметкерлерінің кәсібилігіне ризашылығын білдіріп, Алматы қаласы құқық қорғау органдарының басшылығына алғыс хат жолдады. Хатта былай делінген:
– Медеу аудандық полиция басқармасының анықтау бөлімінің қызметкерлері пәтерімді заңсыз иемдену әрекетіне байланысты алаяқтық істі кәсіби деңгейде тергеді. Олар әрбір жағдайды мұқият зерттеп, әділеттілікті қалпына келтіруге көмектесті. Полиция қызметкерлеріне кәсібилігі, адамгершілігі және бізге деген шыдамдылығы үшін үлкен алғысымды білдіремін. Біздің құқық қорғау органдарында өз ісінің нағыз мамандары мен адам тағдырына бей-жай қарамайтын азаматтардың қызмет етіп жатқаны мақтанарлық жайт.
Алматы қаласы полиция департаментінің баспасөз қызметі бұл оқиғаны полиция қызметкерлерінің заң үстемдігін сақтаудағы адал еңбегінің жарқын үлгісі екенін атап өтті.
Медеу аудандық полициясының мұқият жұмысы құқық қорғау органдарының әділдік пен заңдылықты сақтау жолындағы табандылығын тағы бір мәрте дәлелдеді.