ҚР Қарулы күштері Десанттық-шабуылдау әскерлерінің қолбасшысы генерал-майор Алмаз Жұмакеевтің басшылығымен «Мызғымас бауырластық-2024» бітімгерлік күштерді командалық-штабтық оқу-жаттығуға дайындау жөніндегі екінші штабтық келіссөздер өтті, деп хабарлайды аlmaty-akshamy.kz.
Оған Беларусь, Қазақстан, Қырғызстан, Ресей, Тәжікстан мүдделі ведомстволар өкілдері, генерал-лейтенант Руслан Шпекбаев басқаратын Біріккен штаб офицерлерінің тобы және ҰҚШҰ Хатшылығының қызметкерлері қатысты.
Іс-шара барысында осы жылдың қыркүйек айында Алматы облысының «Жағалау» полигонында өтетін оқу-жаттығу аумағына барлау жүзеге асырылды.
Тараптар оқу-жаттығудың идеясын, ҰҚШҰ Ұжымдық бітімгерлік күштеріне бөлінетін бірлескен қолбасшылық пен ұлттық контингенттердің құрамдарын, практикалық іс-қимылдардың тәртібін, сондай-ақ жан-жақты қамтамасыз етуді ұйымдастыру мәселелерін қарап, келісті.
Екінші штабтық келіссөздердің қорытындысы бойынша делегация басшылары тиісті хаттамаға қол қойды.
Естеріңізге сала кетсек, ҰҚШҰ-ға мүше елдердің бітімгерлік контингенттеріне арнайы дайындалған әскер, милиция (полиция) және азаматтық персонал, сондай-ақ Ұйымға мүше мемлекеттер бөлетін күш-құралдар кіреді. Олардың жалпы саны 4000-ға жетіп жығылады.
Аталмыш оқу-жаттығу ҰҚШҰ әскерлерінің топтарын басқару органдары лауазымды тұлғаларының практикалық дағдыларын арттыру және Ұжымдық қауіпсіздік жүйесі құрамаларының, күш-құралдарының іс-қимылын үйлестіру мақсатында өткізіледі.
Қазақстанның биылғы жылы ұйымға төрағалық ету кезеңінде мәлімделген басымдықтардың бірі – ҰҚШҰ-ның бітімгерлік әлеуетін дамыту.