«Мыңжылқы» кемпинг-аймағы тау демалысын, трекингті, хайкингті және серуендеуді ұнататындарға арналған жабдықталған жазғы лагерь.
Туристердің жайлы және қауіпсіз демалысы үшін шатырлар, жайлы беседкалар, орындықтары бар үстелдер және ұлттық стильдегі «алтыбақан» әткеншектері орнатылды, деп хабарлайды Almaty-akshamy.kz.
Туристерді тартудың жаңа нүктесі кіші Алматы өзенінің бастауында теңіз деңгейінен 3100 м биіктікте орналасқан (2GIS сілтемесі). Маңайында Мәншүк Мәметова атындағы көл мен Амангелді шыңы орналасқан.
«Біз туристер үшін жаңа автобус бағыттарын құру бойынша жұмыс істеп жатырмыз. Әрбір кемпингтің орны тақырыбы мен сипатына сәйкес келетін өзіндік бірегей дизайны бар. Кемпинг аймақтары туралы барлық ақпарат карта платформаларына, соның ішінде 2GIS-ке қосылады», - деді Алматы қаласы Туризм басқармасының басшысы Ғалия Тоқсейітова.
«Мыңжылқы» соңғы жылдары Алматы қаласы Туризм басқармасы ашқан тоғызыншы кемпинг-аймақ болды. Биыл жылдың соңына дейін туристік инфрақұрылымды дамыту шеңберінде БАО - да кемпинг-аймақ құрылатын болады.
Алматы Туризм басқармасы демалушыларды табиғатты аялап, тауда қоқыс тастамауды сұрайды, сонымен қатар жаяу серуендеу кезінде қауіпсіздік ережелерін сақтауды ескертеді:
- Тауға шыққанда, туыстарыңызға маршрутыңыз туралы хабарлау қажет.
- Ауа райына сай киініңіз, теріңізді күннен қорғаңыз. Өзіңізбен бірге қажетті жабдықтарды, бас киім, ас-су және портативті зарядтағышпен зарядталған телефонды алыңыз.
- Арнайы белгіленген жолдан шықпаңыз.
● Құтқару қызметінің SMS ескертулерін қаперге алыңыз.
