Республика күніне орай Алматыда Мемлекеттік Туды көтеру және Әнұранды орындау салтанатты рәсімі өтті. Отансүйгіштік рухты көтеру мақсатында ұйымдастырылған бұл шара "Медеу" биік таулы спорт кешенінде өтті.
Жиынға Алматы қаласының әкімі Ерболат Досаев, мәслихат депутаттары, мемлекет және қоғам қайраткерлері, жастар ұйымдарының өкілдері мен қала тұрғындары қатысты. Салтанатты рәсімнен кейін ашық аспан астында концерт ұйымдастырылды, онда қазақстандық эстрада жұлдыздары қала тұрғындары мен қонақтары үшін өнер көрсетті.
Алматы қаласы Қоғамдық даму басқармасының басшысы Айдар Есенбековтың айтуынша, 25 қазан – тәуелсіздікке алғашқы қадам жасалған тарихи маңызды күн. Егемендік туралы декларация дәл Алматыда қабылданған, сондықтан Республика күні алматылықтар үшін ерекше қастерлі дата болып саналады.
"Республика күнін мерекелеу аясында Алматыда бірнеше күн бойы түрлі іс-шаралар ұйымдастырылуда. Бүгін Медеу шатқалында орналасқан Ту тұғырының жанында "Менің Туым, менің Гимнім" атты патриоттық шара өткіздік. Бұл дәстүрге айналып келе жатқан шарада жыл сайын осы жерде жиналып, Әнұранымызды шырқап, Мемлекеттік Туымызды көкке көтереміз. Жастарға осы күннің мәнін түсіндіру, патриоттық сезімді ояту – біздің басты мақсатымыз", – деп атап өтті Айдар Есенбеков.
Маңызды мереке
1990 жылы Қазақстанның егемендігі туралы декларацияның қабылдануы – еліміздің тарихындағы маңызды оқиғалардың бірі. Бұл күн Қазақстанның тәуелсіздік жолындағы алғашқы қадамы ретінде есептеліп, 2022 жылдан бастап қайтадан ұлттық мереке деңгейіне көтерілді. Соңғы үш жылдан бері Республика күні аясында елдің түкпір-түкпірінде кең ауқымды іс-шаралар өтіп келеді.
Болашақ – жастардың қолында
Жиынның негізгі мақсаты – жастарға еліміздің тәуелсіздігі мен еркіндігі туралы түсінік қалыптастырып, патриоттық тәрбие беру. Осы мақсатта жыл сайын Мемлекеттік Ту астында Әнұран шырқап, ортақ мақсаттар мен құндылықтарға адалдықты білдіру дәстүрге айналып отыр.
Алматыдағы "Менің Туым, менің Гимнім" патриоттық шарасы – еліміздің болашағы жастардың жүрегіне тәуелсіздік пен бірлік құндылықтарын сіңіретін маңызды қадамдардың бірі. Қала тұрғындары үшін бұл мерекелік шара тек көңіл көтеру ғана емес, ортақ құндылықтарымызды сезініп, еліміздің мәртебесін асқақтатуға арналған ерекше мүмкіндік.