Алдағы уақытта қалада жеткізу қызметін адамдар емес, ұшқышсыз ұшу құрылғылары (дрондар) жүзеге асыруы ықтимал. Мұндай жаңашыл идеяны кәсіпкер Сана бизнес форумында бөлісті.
Алматыда өтіп жатқан форумда түрлі салада табысқа жеткен кәсіпкерлер өз тәжірибелері мен жаңа идеяларын ортаға салды. Солардың қатарында отандық логистика және стратегиялық менеджмент саласының көшбасшыларының бірі Болатбек Дәлелханұлы болды. Ол Golden Bridge Partners және Jana Post компанияларының негізін қалаушы ретінде танымал.
Б. Дәлелханұлы форум барысында шағын кәсіптен ірі табысты компания құру жолындағы тәжірибесімен бөлісіп, болашаққа бағытталған жаңа идеяларын таныстырды. Оның айтуынша, серіктесімен бірге жеткізу қызметін жүзеге асыратын дрондарға инвестиция салуда.
Кәсіпкердің бұл идеясы жүзеге асатын болса, Алматы қаласында жеткізу қызметін курьерлер емес, арнайы жасалған дрондар атқарады. Отандық кәсіпкерлердің мұндай жаңашыл идеялары Сана бизнес форумында талқылануда.