Биыл Алматыдағы қыс жылдағыға қарағанда жайлы өтіп жатыр. Қар да әдеттегідей қалың түскен жоқ. Қаңтар айында жауған қардың өзі бұл күндері еріп, көшелерде сирек ағараңдаған іздері ғана байқалады. Көктемнің келуіне де бір айдан аз қалды.
Осыған байланысты редакциямызға қала тұрғындарынан Жаңа жыл мерекесі қарсаңында орнатылған шыршаларға қатысты сұрақтар келіп түсе бастады. Тұрғындардың айтуынша, шамамен бір жарым ай бұрын қойылған шыршаларды жинайтын уақыт әлдеқашан жеткен.
Бұл мәселеге қатысты нақты ақпарат алу мақсатында Алматы қаласы Мәдениет басқармасының баспасөз хатшысымен байланысқа шықтық. Ведомство өкілі бұл сауалымызға қысқаша жауап берді.
"Қаланың басты орындары мен алаңдарында қойылған шыршаларды жинау жұмыстары басталып кетті. Қазір олар кезең-кезеңімен алынып жатыр. Апта басында тиісті тапсырма берілді", - деді ол.
Ал шыршаларды толық жинау жұмыстары қанша уақытқа созылады деген сауалымызға:
"Жинау жұмыстары әдетте бірнеше күнге созылады. Сондықтан нақты мерзімі белгіленбеген. Көбіне басталған соң 7-10 күннің ішінде аяқталады", - деп түсіндірді тиісті орган өкілі.
Айта кетейік, Республика сарайы алдындағы Абай алаңында орналасқан Алматының басты шыршасы 2025 жылдың 18 желтоқсанында жағылған болатын. Қазір бұл шырша да әлі толық жиналып үлгермеген.
Қала тұрғыны жолдаған сурет
Қала тұрғындары мерекелік безендірулердің қашан толық алынатынын күтіп отыр. Ал жауапты мекемелердің мәліметінше, барлық шырша мен безендіру элементі жақын күндері кезең-кезеңімен жиналып, қаланың қоғамдық кеңістіктері қалыпты күйге келтіріледі.
Қаладағы барлық сегіз ауданында жаңа жылдық шыршалар орнатылған. Олардың мекенжайлары:
- Жетісу ауданы – «Гүлдер» саябағы (Серіков көшесі, 2А);
- Бостандық ауданы – «Атакент» КІЫО;
- Әуезов ауданы – «Family Park»;
- Медеу ауданы – «28 гвардияшы-панфиловшылар атындағы саябақ»;
- Алатау ауданы – «Алматы Арена» спорт кешені;
- Наурызбай ауданы – Шұғыла шағынауданы, 347 (амфитеатр);
- Түрксіб ауданы – №6 Оқушылар үйі (Сейфуллин көшесі, 13/1);
- Алмалы ауданы – Абай атындағы опера және балет театры алаңы.