Алматы қаласының әкімі Ерболат Досаев Алмалы ауданының тұрғындарымен кездесу барысында аудан тұрғындарын сапалы медициналық қызметтермен қамтамасыз ету мәселелері белсенді түрде шешіліп жатқанын атап өтті.
Сонымен қатар, ерекше қажеттіліктері бар балаларға арналған жаңа спорт орталығы салынатын болады. Жаңа нысан Райымбек батыр даңғылы, 312 мекенжайында орналасады. Жобада ерекше қажеттіліктері бар адамдарға арналған сауықтыру және жаттығу сабақтарын өткізуге арналған көпфункционалды спорт орталығының құрылысы көзделген. Орталықта екі бассейн болады. Жобалық қуаттылығы ауысымына 144 адамды қабылдай алады.
Құрылыс жұмыстары 2025 жылдың бірінші тоқсанында басталып, сол жылдың соңында аяқталады деп жоспарланған.
Сонымен қатар, әкімнің айтуынша, биыл жөндеу жұмыстары 2010 жылдан бері жүргізілмеген екі әлеуметтік нысанда күрделі жөндеу басталды. Осы жылдың шілде айында Адам репродукциясы қалалық орталығында жөндеу жұмыстары басталды. №1 блоктағы жөндеу жұмыстары 2023 жылдың желтоқсанында, ал №2 блоктағы жұмыстар 2025 жылдың наурызында аяқталады.
Сондай-ақ, №3 емхана ғимаратының күрделі жөндеу жұмыстары 2023 жылдың желтоқсанында аяқталады.