Екі мыңға жуық адам қатысқан.
Жарысқа салауатты өмір салтын ұстанатын 10 мен 80 жас аралығындағы 2 мыңға жуық адам қатысып, түрлі қашықтықтарды жүгіріп өтті, деп хабарлайды Almaty-akshamy.kz Almaty.tv сілтеме жасап.
Шарада алматылықтардан өзге, әдеттегідей, еліміздің түкпір-түкпірінен келген спортшылар да қатысты.
Жарысты жүгіруді күнделікті дағдыға айналдырған қала тұрғындары асыға күткені анық. Олардың арасында түрлі салада қызмет ететін мамандардан бастап, кәсіби спортшыларға дейін бар. Қатысушылар 3 қашықтық бойынша сынға түсті. Балалар 3 шақырымға жүгірсе, ерексектер 10, скандинавиялық жүріспен айналысатындар 7 шақырымдық бәсекеде өздерін сынап көрді.
«Жастарды осындай спортпен айналысуға шақырамын. Менен үлгі алыңыздар. 42 шақырымды 73 рет жүгіргенмін. Мынадай маусымдық жүгіруді мүлде жібермеймін», - дейді қатысушы Тілеужан Қанапиянов.
Ұйымдастырушылар елімізде карантин талаптарының жеңілдегеніне қарамастан, спортшылардың қауіпсіздігіне аса мән бергенін айтады. Яғни, қатысушылар алдын ала «Ашықпен» тексеріліп, кейін жүгіруге мүмкіндік алды. Олар сондай-ақ жолдың уақытша жабылғанына қарамастан, түсіністік танытқан көлік жүргізушілеріне де алғысын айтты.
«Біздің қысқы марафонымыз осымен 8-ші рет өтіп жатыр. Жүгіруді дағдыға айналдырған адам үнемі көңілді, өмірге деген құштарлығы артып, денсаулығы жақсара түседі. Қазір жасөспірімдерге де қатысуға мүмкіндік беріп жатырмыз. Оларды пандемия өршіп тұрған кезде тоқтатқан едік», - деді ұйымдастырушы Салтанат Қазыбаева.
Одан бөлек, ұйымдастырушылар жыл аяғына дейін осындай он шақты марафон өткізуді жоспарлап отыр. Келесі шара 13 наурызға белгіленсе, ең үлкен марафон 25 қыркүйекте өтеді.